OEKUSI, 12 Novembru 2025 (TATOLI) – Entidade sira iha Rejiaun Administrativa Espesiál Oekusi Ambeno (RAEOA), kuarta dadersan ne’e, ensera ona atividade ba komemorasaun loron akontesimentu Masakre Santa-Kruz ho misa iha igreja parókia Numbei no sunu lilin inklui kari ai-funan iha semitériu Santa-Kruz bairru Santa-Roza.
“Misa no kari ai-funan ne’e, nia signifikadu, iha tempu ne’ebá 12 Novembru 1991, la ses, ami ba tuir misa iha Motael, depois hala’o pawai (karavana) ba kari ai-funan iha semitériu Santa-Kruz mak akontese masakre, ne’ebé atividade kada tinan ita hala’o tuir de’it sekuénsia ida uluk ne’e, tanba nia akontese pasadu mai husi misa no kari ai-funan mak hamosu masakre, ne’ebé atividade barak hala’o loron lima, ohin ita ensera ho misa depois pawai mai to’o semitériu,” Prezidente Komite 12 Novembru iha Oekusi, Domingos de Almeida, ko’alia iha semitériu Santa-Roza, ohin.
“Ita hanoin fila-fali akontesimentu Makasare Santa-Kruz iha 1991. Liuhusi selebrasaun ohin tama ona ba tinan-34, motivazaun ba ita liu-liu ba joven sira iha Oekusi tantu feto no mane, mai hamutuk oinsá prepara futuru di’ak, labele husu bebeik ba Estadu saida mak atu halo, maibé idak-idak husu ba an rasik saida mak atu halo ba Estadu ne’e,” nia hateten bainhira sunu lilin no kari ai-funan iha semitériu bairru Santa-Kruz, ohin.
Notísia relevante:RAEOA ajenda atividade neen komemora 12 novembru no loron nasionál juventude
Nia fó ezemplu, tempu agora tenke hatudu mudansa, primeiru ba atetude pesoál, karik antes ne’e baruk atu estuda agora ba oin tenke badinas, maibé filozofia ba hanoin moris ne’e hanesan roda nakdulas, ne’ebé hakarak ka lakohi nasaun tenke la’o ba oin ona, juventude mak sai rotasaun lideransa ba futuru, tanba Timor-Leste adere ona ba membru ASEAN.
“Ida-ne’e mak kada tinan ita fó hanoin ba alin juven sira hanesan estudante, hakarak ka lakohi tenke banati tuir juventude pasadu ne’ebé rai hela lembransa ne’ebé di’ak,” nia afirma.
Notísia relevante:Saúde Oekusi hala’o akampamentu triajen masál no konsulta espesialidade iha Oesilo
Koordenadór ZEEDOA, Herculano Sousa, reprezenta autoridade RAEOA, agradese ba komisaun organizadora, tanba bele organiza eventu istóriku ne’e ho susesu to’o faze enserramentu ho di’ak.
“Ita nafatin fó agradesimentu ba luta na’in-sira, martir sira no mate restu sira, tanba iha momentu ne’ebá sé hirus-matan atu defende Timor-Leste ukun rasik-an, tan ne’e mak ita espera partisipasaun ema hotu, nune’e ema hotu bele sente no orgullu ba importánsia husu loron masakre ne’e,” reprezentante ne’e agradese.
Nia hateten, lema ba tinan ne’e katak, Ha’u timoroan, ha’u orgullu ba ha’u-nia nasaun, tan ne’e nu’udar Oekusi-oan, ita tenke husu ba ita-nia an, tan ne’e fó hanoin nafatin ba juventude sira, atu kontinua espirítu ida-ne’e, tanba luta sira-ne’ebé ita maun sira uluk halo, balun mate no terus iha semitériu Santa-Kruz, ne’e refleta mai ita atu saida mak atu halo ba futuru.
“Ita-nia Primeiru-Ministru, sempre ko’alia, labele husu nasaun atu halo saida ba ó, maibé husu ba ó-nia an rasik saida mak halo ba ó-nia nasaun, entaun ita hotu presiza unidade sira-ne’ebé sei joven kontinua estuda, ida-ne’e mak ita-nia kontribuisaun,” Herculano reitera.
Notísia relevante:Dignifika akontesimentu 12 Novembru, Entidade RAEOA voluntária hamoos semitériu no igreja
Entretantu, tema ba komemorasaun loron nasionál juventude no loron akontesimentu Masakre Santa-Krus 12 Novembru ba tinan ne’e mak, ‘Ha’u Timoroan Orgullu ho Ha’u Nia Nasau’
Tuir observasaun jornalista Ajénsia Tatoli, I.P hafoin misa no kari ai-funan, parte komisaun organizadora kontinua fahe prémiu ba manán na’in-sira hanesan sertame no diskursu públiku.
Jornalista: Abílio Elo Nini
Editór: Rafael Ximenes de A. Belo
