RAEOA ajenda atividade neen komemora 12 novembru no loron nasionál juventude
OÉ-CUSSE, 06 novembru 2023 (TATOLI – Sentru Juventude Rejiaun Oé-Cusse (CJRO, sigla portugés), daudaun ne’e prepara atividade hodi komemora loron masakre Santa Crus 12 Novembru ba dala-33 no loron nasionál juventude ba dala-22 iha Oé-Cusse Ambeno, ho tema, ‘Ho Espíritu 12 Novembru Promove Kreatividade no Pensamentu Krítiku Foinsa’e hodi Harii Sosiedade Kontribuente no Inkluziva’.
Diretór CJRO, Dionísio Taec, informa atividade neen, ne’ebé prepara maka hanesan, semináriu nasionál, kalan reflesaun, misa no kari ai-funan, sertame no diskursu públiku alvu ba juventude sira.
Atu finansia atividade hirak-ne’e, Governu liuhosi Ministériu Juventude Desportu Arte no Kultura (MJDAK) aloka ona osan hamutuk rihun $4, hodi fahe ba sub-rejiaun haat, tanba komemorasaun ne’e sei konsentra iha kada sub-rejiaun sira.
“Fundu ne’e ami fahe ba sub-rejiaun haat, iha Oésilo, Nítibe no Pássabe hetan $750,00, iha Pante Makasar maka hetan $1500,00 tanba akumula suku ualu,” Dionísio Taec, ko’alia ba jornalista sira iha CJRO Oé-Cusse, segunda ne’e.
António de Araújo, nu’udar komisaun organizadora iha sub-rejiaun Pante Makasar, orgullu tanba atu prienxe atividade ba komemorasaun ne’e, sei iha atividade haat, primeiru realiza semináriu nasionál, hodi refleta ba loron nasionál juventude no 12 novembru masakre Santa Cruz, misa no kari ai-funan.
Alende ne’e mós hakarak hasa’e koñesimentu ba estudante sira liuhosi sertame no diskursu públiku, ligasaun ho tema jerál ne’ebé iha.
“Ita agradese tanba atividade sira-ne’e, foku ba estudante sira, atu hatene loron istóriku sira hodi hasa’e sira-nia koñesimentu, liuliu loron boot rua ne’e,” nia katak.
Jornalista: Abílio Elo Nini
Editór: Evaristo Soares Martins
