OEKUSI, 10 Novembru 2025 (TATOLI) – Komisaun Organizadora ba komemorasaun loron nasionál juventude no loron akontesimentu Masakre Santa-Kruz 12 Novembru, organiza entidade sira hotu iha Rejiaun Administrativa Espesiál Oekusi Ambeno (RAEOA), voluntarimente, hala’o limpeza jerál hodi hamoos semitériu Santa-Krus iha bairru Santa-Roza no mós hamoos igreja Parókia Nossa Senhora Numbei no Igreja antigu Santo António hodi hanoin hikas loron akontesimentu Masakre Santa-Kruz 12 Novembru 1991.
Prezidente Komisaun Organizadora 12 Novembru iha Oekusi, Orlandus Colo, informa, objetivu husi asaun voluntáriu ne’e atu hanoin hikas ita-nia maluk sira-ne’ebé mate iha loron 12 Novembru 1991 liubá.
“Tanba iha mumentu ne’ebá, ami hamutuk, ita haree kolega barak mate, balu kanek ho tipu oi-oin, entaun ita fó omenajén ba sira iha loron ida de’it, mak hamoos rate sira no igreja, maske ita haree simples buat ki’ikoan ida, maibé iha nia signifikadu,” nia hateten iha Oekusi, ohin.
Sobrevivente ne’e informa, iha asaun ne’e mós hetan apoiu másimu husi Autoridade RAEOA, nune’e bele fó biban ba funsionáriu inklui instituisaun sira seluk, hodi partisipa direita.
“Ohin ita hahú ho limpeza jerál ba semitériu no igreja sira, ita serbisu hamutuk ho Autoridade RAEOA, ne’ebé antes ne’e fó ona sirkulár ida ba parte hotu, atu-bele partisipa, tanba limpeza jerál ne’e, la’os funsionáriu de’it maibé parte igreja, PNTL, ONG sira, estudante inklui komunidade sira,” nia katak.
Notísia relevante:RAEOA ajenda ona atividade prinsipál lima ba komemorasaun 12 Novembru
José Elo nu’udar materestu 12 Novembru 1991, konsidera asaun ne’e importante atu kontinua fó hanoin ba jerasaun kontinuadora sira atu difnifika nafatin loron akontesimentu 12 Novembru 1991.
“Ita mai ho voluntariamente, mai atu hamoos rate sira no balun ba hamoos iha igreja, ida-ne’e siginfika, uluk demostrasaun to’o akontese 12 Novembru 1991 ne’e, ita hahú husi igreja mak to’o Santo-Kruz, ne’ebé buat sira-ne’e tanba ohin loron ita moris barak ona, entaun ita tenke hala’o asaun sira hanesan ne’e, atu dignifika ita-nia maluk sira-ne’ebé lakon sira-nia vida iha loron ne’e, depois ita sira-ne’ebé sei moris kontinua haklaken nafatin istória ne’e ba jerasaun sira, ne’e mak ohin ita haree funsionáriu no estudante sira barak mak mai partisipa ho voluntária,” nia hateten iha semitériu Santa-Kruz iha bairru Santa-Roza, ohin.
Notísia relevante:Saúde Oekusi hala’o akampamentu triajen masál no konsulta espesialidade iha Oesilo
Jornalista: Abílio Elo Nini
Editór: Rafael Ximenes de A. Belo
