Projetu sala estensaun EBF Mahata iha suku Kutete inauguradu
OEKUSI, 10 Novembru 2026 (TATOLI) – Diresaun Servisu Rejionál Edukasaun Rejiaun Administrativa Espesiál Oekusi Ambeno (RAEOA) hamutuk ho Programa Nasionál Dezenvolvimentu Suku (PNDS), segunda ne’e inagura projetu sala estensaun Eskola Bázika Filiál (EBF) 1.2.3 Mahata, ne’ebé lokaliza iha aldeia Mahata suku Kutete sub-rejiaun Pante Makasar.
Superintendente Edukasaun, Luis Timo, reprezenta Diresaun Servisu Rejionál Edukasaun, hato’o agradesimentu kle’an no apresiasaun boot ba ekipa PNDS RAEOA nian ne’ebé hatudu ona kompromisu boot hodi apoiu servisu infraestrutura edukasaun nian.
“Agradese tebes ba apoiu husi PNDS, tanba tulun tebes Servisu Rejionál Edukasaun, liuliu iha kestaun hadi’a no dezenvolve infra-estrutura eskola sira ne’ebé presiza atensaun lalais, tanba ita hatene, kada tinan númeru estudante aumenta, entaun presiza mós fasilidade,” nia hateten iha seremónia ne’e.
Nia espera programa PNDS ba futuru kontinua tau matan no prioritiza setór edukasaun iha Oekusi, nune’e bele apoia ba reabilitasaun no estensaun iha eskola sira.
Oinsá sentimentu?
Koordenadora EBF 1.2.3 Mahata, Hermina Caet, reprezenta manorin no estudante sira, agradese ba Konsellu Suku Kutete tanba tinan ne’e prioridade EBF Mahata.
“Ami orgullu tebes no agradese ba Konsellu Suku Kutete, tanba tinan ne’e fó prioridade ba EBF Mahata atu aumenta saladeaula, ami promete katak, fasilidade ne’ebé ohin Entrega ona, ami sei utiliza ho resposansabilidade, hodi asegura atu labele hetan estragu,” nia orgullu.
Iha biban ne’e, Diretór PNDS Oekusi, João Bobo, relata katak, konstrusaun saladeaula foun ne’e, ezekuta ho orsamentu rihun $44,250.00, jere diretamene liuhusi jestaun alokasaun Suku Kutete nian.
Nune’e mós kona-ba fornesimentu materiál konstrusaun referida mai husi kompaña lokál Nanri 4-Ever Unipesoál Lda, hodi susesa konklui obra ne’e ba sala haat komposta husi sala tolu ba estudante sira no sala ida ba profesór sira.
Notísia relevante:MAE no Embaixadór Japaun inaugura projetu infraestrutura CIREP 12 iha Nítibe
Jornalista: Abílio Elo Nini
Editór: Rafael Ximenes de A. Belo
