DILI, 06 Outubru 2025 (TATOLI) – Servisu Rejistu no Verifikasaun Emprezariál, Institutu Públiki (SERVE, I.P) durante fulan sia, entre Janeiru no Setembru 202, rekolla ona reseita $4.645,25 ba kofre Estadu.
Xefe Unidade Rejistu Komersiál SERVE, I.P, Hélio da Costa, hateten reseita sira ne’e mai husi atividade rejistu empreza nasionál, internasionál no seluk tan.
Nia esplika katak durante ezisténsia SERVE I.P, hahú husi 2013 to’o 2025, halo ona tratamentu ba Sertidaun Lisensa ba tipu komersiál hamutuk rihun 77-resin.
Tuir nia, SERVE, I.P iha ninia papél atu halo rejistu no verifikasaun ba tipu empreza ne’ebé hakarak mai rejista empreza ho tipu hanesan ENIM, Unipesoál, Lda limitada, Sosiedade Anónima (SA) no Empreza Públika.
Nia relata husi tipu komersiál sira ne’e mak ba SERVE rejistu tipu Individual Enterprise (ENIN) hamutuk 31.537, Unipessoal, LDA hamutuk 27.328, Sosiedade LDA (Limitada) 27. 328, Sosiedade Anónima (S.A) 122, Reprezentante Permanente (R.P) 545 no Empreza Públika (E.P) ualu.
Tuir nia, husi totál empreza rihun 77-resin ne’e kompostu husi pesoál empreza internasionál (estranjeira) hamutuk 5.510, empreza lokál (nasionál) hamutuk 26.154, empreza konsórsiu (joint venture) 758.
Aleinde ne’e, SERVE, mós halo ona ezekusaun ba Orsamentu Jerál Estadu 2025 hamutuk 66% husi totál alokasaun millaun $2-resin.
Jornalista: Arminda Fonseca
Editora: Maria Auxiliadora
