CAILACO,05 marsu 2024 (TATOLI)-Aban, kuarta loron (06/03/2024) ne’e Governu liuhosi Ministru Administrasaun Estarál, Tomás Cabrál, sei fó pose ba Prezidente foun Autoridade Munisipál Bobonaro, Alexandrino Pires, iha Jináziu Maliana.
Nune’e povu postu administrativu Cailaco husu Prezidente Autoridade foun hakbesik aan ba Baze.
Núne’e komunidade husu ba Prezidente Autoridade Munisipál Bobonaro foun,molok ezerse funsaun tenke halo uluk oráriu visita ba suku no aldeia sira núne’e bele identifika problema no preokupasaun ne’ebé komunidade sira hasoru.
Xefe suku Manapa, Zeferino Loco Bere, hateten durante ne’e observa komunidade sira barak sei morís terus, tanba enfrenta hela problema kona-bá kondisaun estrada ladi’ak, la asesu eletrisidade, bee-moos, saúde no edukasaun.
“Ami ezije ba Prezidente Autoridade Munisípiu Bobonaro foun ho ninia ekipa tomak labele de’it iha munisípiu, tenke tún ba baze hodi identifika komunidade nia halerik no nia moris to’o iha-ne’ebé, tanba kada vez ami husi suku hato’o ba mos sira seidauk tau atensaun,” nia ko’alia biha edifísiu administrativu Cailaco, tersa ne’e.
Zeferino Loco Bere husu ba Prezidente Autoridade Munisipál Bobonaro atu ko’alia ho governu hodi aselera prosesu rekrutamentu estrutura suku atu nune’e bele halo atendimentu ba komunidade.
Tuir nia, daudaun ne’e servisu Administrasaun Suku la’o la efetivu, tanba governu hapara ona kontratu Pesoál Apoia Administrasaun Suku (PAAS) iha fulan dezembru 2023 liubá.
“Durante ne’e ami (xefe suku) sira mak mesak halo servisu atende komunidade, sira mai barak ami mesak labele atende,” Líder komunitária ne’e akresenta.
Alende komunidade suku Meligo, postu administrativu Cailaco, Agustino Pires, espera Prezidente Autoridade Munisipál Bobonaro foun hanesan jerasaun foun iha komitmentu atu lori dezenvolvimentu to’o baze.
“Ami haree katak durante ne’e ita iha projetu PDIM ne’e konsentra de’it iha munisípiu no postu, maibé suku ne’e seidauk, tanba ne’e ami husu ba prezidente foun, iha tinan oin tau prioridade ba projetu ne’e iha suku sira hanesan saúde, edukasaun estrada tanba ami iha suku ne’e barak sei halerik ba dezenvolvimentu,” nia rekomenda.
Nia mos sujere ba Prezidente Autoridade Munisípiu foun, atu halo komunikasaun ho governu hodi aselera projetu reabilitasaun estrada diresaun Cailaco ba Maliana.
“Ami-nia estrada ne’e durante tinan 20 ona aat tebes, udan ona ami liu ba mai ladi’ak, bee nakonu hanesan fali mota, ema isin rra mak liu labarik bele moris kedas, ne’ebé estrutura foun Bobonaro presiza haree mos ba ida-ne’e,” nia fó hanoin.
Enkuantu iha tinan fiskál 2024 autoridade Munisípiu Bobonaro hetan alokasaun orsamentu hosi governu sentrál hamutuk $9,270,244.00, hosi montante ne’e aloka ba kapitál Dezenvolvimentu $2,518,287.
Notísia relevante: Estrutura foun Autoridade Bobonaro presiza marka diferensa
Jornalista: Sérgio da Cruz
Editór: Evaristo Soares Martins
