DILI, 04 Maiu 2026 (TATOLI)—Vise Chairman National Commitee, Chinese People’s Political Consultative, Conference, Chairman of GX Foundatin, Leung, segunda ne’e, hasoru malu ho Prezidente Repúblika José Ramos-Horta hodi relata kona-ba apoia mákina modernu produsaun bee-moos nian hamutuk 100 ba Timor-Leste.
“Ha’u mai hato’o ba Prezidente Ramos-Horta kona-ba apoia ne’ebé durante ne’e ami fornese mákina modernu kona-ba bee-moos nian ba Timor-Leste, mákina sira ne’e utiliza téknolojia foun,” Leung hateten ba jornalista sira hafoin remata enkontru ho Xefe Estadu.
Nia dehan, mákina hirak ne’e instala ona iha igreja no eskola sira iha Timor-Leste.
“Mákina sira ne’e akomula ona bee-moos tonelada 2,8. Husi mákina ne’ebé iha bele halo redusaun ba bee-moos sira-ne’ebé utiliza garafa plastíku,” nia dehan.
Nia hatutan, mákina ne’ebé fornese ba Timor-Leste liuliu ba eskola no igreja sira hahú iha tinan 2024 nia-rohan. Apoiu ne’e hanesan asaun karidade ida ba povu Timor-Leste.
“Timor-Leste nasaun ida-ne’ebé privilejiu hodi simu mákina dahuluk kona-ba produsaun bee-moos nian,” nia dehan.
Alende ne’e, fundasaun referidu fó mós oportunidade ba estudante universitariu timoroan hamutuk na’in-10 ba tuir interkambiu iha Hong Kong no iha fulan-Juñu estudante timoroan 11 sei ba tuir tan interkambiu iha Hong Kong.
Jornalista : Hortencio Sanchez
Editór : Cancio Ximenes
