DILI, 15 marsu 2024 (TATOLI)— Programa Estudu Mestradu Saúde Públika husi Universidade Nusa Cendana Kupang kolabora ho Universidade Dili (UNDIL), hodi hala’o servisu sosiál ka servisu komunitáriu iha loron 9 marsu, iha fronteira entre Timor-Leste no Indonézia liuliu iha área PLBN Wini.
Tuir nota ne’ebé Agência TATOLI, I.P asesu, kinta ne’e, katak programa ne’e realiza tanba Universidade rua ne’e hala’o ona akordu iha tinan hirak liubá. Ho akordu ne’e fó ona biban hodi servisu hamutuk liuliu iha área saúde.
Husi komitementu liuhosi akordu ne’e mak universidade rua ne’e hala’o servisu komunitáriu iha área fronteira nasaun rua nian no hetan partisipasaun másimu husi komunidade, pasajeiru no mós funsionáriu, militár sira iha Fronteira.
Atividade ne’e envolve mós estudante no dosente hamutuk 36. Dosente na’in haat husi universidade rua ne’e akompaña estudante sira ne’ebé hala’o sira-nia servisu. Atividade mak halo konsulta saúde jerál, halo screening ba moras la hada’et no hada’et no halo kontrolu ba malária liuhusi fronteira ho objetivu ba ema sira ne’ebé moris hale’u PLBN Wini bele moris ho saudavél.
“Atividade ida-ne’e, hanesan forma implementasaun ida husi Tri Dharma ensinu superiór, ida-ne’ebé mak servisu ba komunidade sira iha fatin hanesan PLBN Wini,” haktuir prezidente komisaun Dominggus.
Ho asaun sosiál ne’e, Prezidente Komisaun ne’e espera katak atividade ida-ne’e bele hadi’a ema nia saúde iha área fronteira liuhusi esforsu atu prevene moras hada’et no la hada’et.
Iha sorin seluk, Xefe Programa Estudu Pos Graduadu Saúde PÚblika Universidade Nusa Cendana, Dr. Andreas Umbu Roga, mós apresia implementasaun atividade servisu komunitáriu ida-ne’e no agradese tebes tanba oferese ona buat ruma ba komunidade.
“Ba oin bele habelar tan atividade sosiál hanesan ne’e no envolve universitáriu sira”, katak nia.
Entretatantu, Xefe Departamentu Siénsia Saúde Públika iha UNDIL, Fitri Kusuma Sari, hato’o agradese wain ba Universidade Undana Kupang ne’ebé halo kooperasaun diák tebes.
Tanba, Xefe Departamentu ne’e, afirma atividade ne’e bele hametin liután kooperasaun nasaun rua ne’e iha área saúde liuliu prevensaun ba moras sira.
TATOLI
