DILI, 22 abríl 2024 (TATOLI) – Governu Timor-Leste liuhusi Enviadu Espesiál, Embaxadór ba Asuntu Klimátiku, Adão Soares Barbosa, akompaña husi Konselleru Ministériu Negósiu Estranjeiru no Kooperasaun (MNEK) Licínio Branco arranka ona ba Bangladesh hodi partisipa reuniaun nivél aas National Adaptation Plan (NAP) no exibisaun.
Hanesan membru grupu peritu Nasaun Menus Dezenvolvidu (LEG), Vise-Prezidente LEG, Embaixador Adão Soares Barbosa hetan konvite husi Sekretariadiu LEG / Sekretariadu Konvensaun-Kuadru ONU ba Alterasaun Klimátika (UNFCCC) hodi partisipa iha NAP ho exibisaun no reuniaun péritu hodi haree progresu ne’ebé atinje ona iha prosesu formulasaun no implementasaun NAP ne’ebé sei realiza 22 – 25 abríl 2024.
“Reuniaun ne’e hala’o iha Daka, Bangladesh hodi hatan ba pedidu husi Governu Bangladesh ne’ebé serbisu hamutuk ho Sekretariadu UNFCCC,” tenik iha nota ne’ebé Agência TATOLI asesu husi mídia MNEK, ohin.
Duante reuniaun loron haat, Embaxadór Adão Barbosa sei fasilita diskusaun temátika balun relasiona ho formulasaun no implementasaun ba NAP no implementa iha kada nasaun dezenvolvida.
NAP mak programa ida husi LEG ne’ebé realiza tinan ida dala ida. Espozisaun ne’e hodi halibur autór no parte interesadu sira, hodi hola desizaun polítika sira ba NAP, reprezentante husi Fundu Klimátika Verde, Fundu Mundiál ba Ambiente, ONU organizasaun internasionál, ajénsia bilaterál no multilaterál, sentru rejionál no setór privadu, ne’ebá mak inklui mós sidadaun sientista no profisionál kona-ba adaptasaun ba mudansa klimátika.
Reuniaun NAP ne’e sei loke ofisiál husi Primeira-Ministra Bangladesh, Sheikh Hasina, no nasaun membru LEG, ONU, organizasaun naun-governamentál nasionál no internasionál, Banku Mundiál, Fundu Kilmátika Verde, Fundu Mundiál ba Ambiente no seluktan.
Jornalista: Hortencio Sanchez
Editór: Rafael Ximenes de A. Belo
