DILI, 25 abríl 2024 (TATOLI)—Reitór Universidade Nasionál Timor Lorosa’e (UNTL), João Martins, rekomenda ba Ministériu Ensinu Superiór Siénsia no Kultura (MESSK), José Honório Jerónimo, atu mellora infraestrutura Universidade Nasionál Timor Lorosa’e (UNTL).
“Ba oin Governu liuhusi MESSK bele tau ona atensaun para bele aumenta orsamentu ba iha UNTL, atu nune’e mellora ita-nia infransturtura. Husu atu aumenta tan konstrusaun iha seladeaula foun, hadi’a ita-nia biblioteka, laboratóriu, ho nune´e bele hadi’a kualidade,” Reitór UNTL João Martins, hateten ba Agência Tatoli, hafoin konferénsia imprensa, iha salaun UNTL, Caicoli, kuarta ne’e.
Tanba ne´e, nia dehan, tenke aposta kualidade ne’ebé di’ak maibé kestaun ida mak menus rekursu umanu inklui finanseiru.
“Ita iha limitasaun, entermu infransturtura, rekursu umanu, inklui kustu finanseira, buat ne’e ideál nunka akontese. Tanba ne´e mak ministériu presiza tau atensaun no hadi’a kestaun hirak-ne’e hotu, nune’e universidade ida-ne’e mais kualidade iha edukasaun,” nia dehan.
Tanba, tuir nia, atu hadi’a kualidade edukasaun iha Timor-Leste mak Governu presiza tau atensaun ba setór edukasaun, hodi nune’e bele hetan kualidade ne’ebé mak di’ak liután iha futuru, entaun tenke tau orsamentu ba setór edukasaun.
Diretór Ezekuta Timor-Leste Coalition Education (TLCE), José Monteiro, hateten ezisténsia TLCE ba monitorizasaun situasaun edukasaun iha Timor-Leste hatudu, seidauk iha mudansa signifikativu entermu infraestrutura eskolár.
“Iha ita-nia rain liuliu saladeaula ne’ebé seidauk sufisiente iha ensinu báziku no ensinu sekundáriu. Ida-ne’e kontribui hosi investimentu Estadu nian ba konstrusaun ka espansaun no la haree ba demanda númeru estudante ne’ebé tinan-tinan sempre aumenta. Ida-ne’e hatudu ita presiza haree no halo revizaun, nune’e kria fali infraestrutura bázika edukativu nian, hodi bele absolute tiha ita-nia estudante sira,” nia hateten.
Jornalista : Osória Marques
Editór : Cancio Ximenes
