DILI, 01 Jullu 2026 (TATOLI)—Sekretáriu Estadu Arte no Kultura, Jorge Soares Cristovão, hateten, Governu hahú halo preparasaun ba prosesu lansamentu konstrusaun biblioteka nasionál iha 06 Jullu tinan-ne’e.
“Prosesu hotu ita prepara ho di’ak entre Sekretaria Estadu Arte no Kultura (SEAK) no Autoridade Nasionál Petróleu no Empreza, nune’e iha 06 fulan-ne’e ita sei halo lansamentu ba biblioteka nasionál ne’ebé nia prosesu la’o kuaze tinan barak nia laran ona,” nia dehan jornalista sira iha Komoro, Kuarta ne’e.
Nia hatutan empreza instala hotu ona ekipamentu pezadu sira, nune’e bainhira halo lansamentu empreza hahú kedan servisu.
Notísia relevante: Konstrusaun Biblioteka Nasionál Timor-Leste komesa iha Marsu 2026
“Kondisaun hotu iha terrenu preparadu, tanba ita lakohi bá halo de’it lansamentu ba fatuk dahuluk, maibé bainhira halo lansamentu iha loron tuirmai empreza hahú servisu ona,” nia hateten.
Enkuantu, konstrusaun biblioteka nasionál sei responsabiliza husi Empreza CGCOC-ASUC JV. ho nia durasaun fulan 18 to’o 20, gasta orsamentu millaun $10 ne’ebe prepara husi Kompañia ENI Timor-Leste.
Jornalista: Osória Marques
Editór: Xisto Freitas da Piedade
