DILI, 25 abríl 2024 (TATOLI)- Prezidente Repúblika,José Ramos Horta, kuarta foin lalais ne’e, kontinua fó apoia sosiál liuliu nesesidade báziku ba komunidade suku Alaua-Leten, Postu Administrativu Baguia, Munisípiu Baucau.
Apoia ne’e Prezidente Repúblika oferese liuhosi diresaun Sosiedade Sivíl no Apoiu Sosiál (SSAS), Prezidénsia Repúblika.
Hafoin simu apoia referidu, Xefe Suku Alaua-Leten, Joaquim Ximenes, hato’o agradese ba apoia ne’ebé fó husi Prezidente Repúblika.
“Agradese ba Xefe Estadu ho ekipa maske kalan maibé to’o mai hodi fahe nesesidade bázika inklui lori materiál tuir pedidu ne’ebé ami hato’o iha Janeiru 2022, liuliu husi grupu to’os na’in sira. Ami hanoin katak pedidu ne’e haluha ona tanba tinan rua ona, maibé nafatin konsidera ohin materiál to’o mai,” hateten Xefe Suku, Joaquim hatete liuhusi nota ne’ebé Agência TATOLI asesu husi mídia Palásiu Prezidensiál, ohin.
Iha Janeiru 2022 bainhira vizita Alaua-Leten no sira entrega pedidu, la’ós hanesan Prezidente Repúblika, maibé nu’udár Ex-Titulár ( Eis-Prezidente Repúblika 2007-2012).
Tuir nia fó pedidu nu’udár ex-titulár iha momentu ne’ebá ho objetivu atu tulun família vulnerálvel inklui atu hasa’e produsaun agrikula ba komunidade Alaua-Leten.
Iha fatin hanesan, Asesór SSAS, Quintiliano Moníz, ne’ebé lori apoia sosiál ne’e afirma, ” Bainhira atuál Prezidente Repúblika, mai vizita komunidade balun fó pedidu atu tulun sira, nune’e tuir orientasaun bainhira molok haka’at ba Portugál, haruka ha’u atu lori materiál hirak ne’e mai komunidade Alaua-Leten tuir pedidu tanba kle’ur ona”, nia afirma.
Entretantu, apoia sira tuir pedidu mak hanesan “Handtratór” ida, Mákina dulas haree ida, mákina ba “rontok” haree ida, Mákina suku ropa manuál no automátiku ida, ekipamentu desportu unidade ida, Tambór inklui nesesidade báziku ba família vulnerável uma-kain 25 no “manta” hamutuk 120.
Jornalista: Hortencio Sanchez
Editór : Florencio Miranda Ximenes
