BAUKAU, 01 Jullu 2026 (TATOLI)—Sidadaun mane ho naran Domingos da Costa Soares hakotu vida liuhusi dalan tara-an iha Aldeia Uaibiana, Suku Gariuai, Postu Administrativu Baukau Vila, Munisípiu Baukau.
Kazu referidu akontese iha meudia tuku 13:55 Otl, Segunda (30/06/2026), bainhira família hetan mate-isin vítima nian ne’ebé hatalik-an ho tali iha hali ne’ebé moris besik foho lolon.
Matebian sai husi uma iha dadeersan tuku 10:00 Otl lori ho bibi rua bá kesi iha duut, iha-ne’ebé iha ona intensaun atu hakotu vida tanba to’o iha fatin akontesimentu vítima haruka foto no mensajen bá feen-kaben Miranda Soares ho konteúdu mensajen “Solusaun ikus mak ne’e ona, ha’u lakohi ona atu hanoin aat ba O’. Ha’u presiza ama Mi nia orasaun”. Haree ita-rua nia oan ba… Ba sala ne’ebé durante ne’e ha’u halo ba ne’e, ha’u husu deskulpa, inklui O nia pasénsia. Rohan mak ne’e ona. Laiha ona dalan seluk atu rezolve problema”.
“Problema iha uma-laran mak problema feto ulun-halai. Atu rezolve maibé la konsege,” viziñu nu’udár sasin, José Ernesto Freitas informa ba jornalista sira liuhusi telefónema, Tersa ne’e.
José relata bainhira viziñu hamutuk ho família hetan isin-mate kontinua kedas informa ba parte Polísia Nasionál Timor-Leste (PNTL) Munisípiu Baukau, iha-ne’ebé parte seguransa liuhusi Seksaun Investigasaun Kriminál dezloka kedas ba iha lokál krime hodi rekolla dadus hanesan foto, sukat tali no halo investigasaun ba kazu referidu.
Rezultadu investigasaun matebian deside hakotu vida hanesan tali kesi iha kakorok ho medida sentimentru 1,20, enkuantu altura tali kesi ba ai to’o rai medida distánsia sentimetru 2,50, tali bobar iha ai medida sentimetru 45, husi ain to’o rai medida sentimetru 28.
Aleinde ne’e, PNTL rekolla informasaun husi feen-kaben ho insiál MS nu’udár mós sasin ne’ebé deklara antes kazu akontese husu matebian atu transporta oan feto ne’ebé moras ba ospitál maibé vítima la disponivel no husik hela re’in ba feen no oan antes lori sai bibi ba kesi no to’o lokál kazu, feen simu mensajen via WhatsApp purvolta tuku 11:02 Otl.
“Ami na’in-rua katuas oan moris hamutuk durante tinan 18 ona. Ha’u-nia la’en nunka halo problema ho ema sé de’it. Só foin daudaun ne’e mak ami iha problema interena (ha’u ho mane seluk konversa via telefone) ne’ebé ami koko rezolve ona maibé seidauk iha solusaun derepente de’it ohin nia bele foti desizaun ba nia an, hodi tara-an,” feen-kaben deklara liuhusi nota informasaun ba PNTL Baukau ne’ebé TATOLI asesu, Kuarta ne’e.
PNTL Baukau liuhusi Servisu Investigasaun Kriminál (SIK) kontinua husu bạ família atu lori mate-isin atu hala’o prosesu autopsia nune’e evakua kedas ba Ospitál Nasionál Guido Valadares (HNGV-sigla portugeza) hodi fasilita prosesu investigasaun.
Entretantu, matebian lakon vida ho idade 41, moris iha 24 Janeiru 1985, iha Suku Loilubo, Postu Administrativu Vemasse, hela fatin iha Aldeia Uaibiana, Suku Gariuai, nu’udár kazadu, iha oan feto ida, profisisaun hanesan vendedór kupaun jogu lotaria.
Jornalista: Natalino Belo
Editór: Xisto Freitas da Piedade
