VIQUEQUE, 05 maiu 2024 (TATOLI)- Xefe Suku Uma Uain-Leten, Postu Administrativu Viqueque Vila, munisípiu Viqueque, Martinho Soares Gusmão, informa hafoin udan-boot halo mota Lugasa nakonu hodi fó ameasa ba abitante uma-kain 10-resin atu hetan inundasaun.
“Iha ne’e udan-boot akontese hahú sesta (02/05) to’o mai horikalan hodi rezulta mota Lugasa nakonu no fó ameasa boot ba ha’u-nia komunidade sira-nia uma. Tanba mota besik lori halai rai sira besik komunidade sira uma”, Martinho Soares Gusmão, hateten ba Agência Tatoli, suku Uma Uain Leten, Postu Viqueque Vila, ohin.
Martinho haktuir, distánsia mota ba abitante sira-nia uma hela metru lima-resin, ida-ne’e mak mota tun nafatin uma sira-ne’e mota sei lori hotu tanba rai monu besik komunidade nia uma.
Ho situasaun ne’e, nia dehan komunidade preokupa tebetebes tanba laiha moru protesaun, nune’e husu ba autoridade liuliu Servisu Obras Públiku munisípiu Viqueque atu responde urjente ka halo normalizasaun ka hasai sedimentasaun iha mota Lugasa atu labele fó ameasa ba abitante sira.
“Preokupasaun ne’e ha’u hato’o beibeik ona ba parte relevante sira no sira orienta sira-nia tékniku sira mai sukat ona, maibé laiha resposta ruma. Nune’e ha’u sujere nafatin ba parte relevante sira se bele udan para mai haree hodi halo moru protesaun ruma atu asegura ita-nia abitante sira-nia uma”, nia sujere.
Jornalista: Vitorino Lopes da Costa
Editór : Florencio Miranda Ximenes
