DILI, 15 maiu 2024 (TATOLI)– Ekipa istimadu husi Munisípiu Liquiça Vila-Vista FC posibilidade sei elemina husi kopa Maun Boot Kay Rala Xanana Gusmão bainhira derrota kontra adversariu Laivai FC ho rezultadu 1-2.
Jogu entre ekipa rua hala’o iha estádiu Munisipál Dili, kuarta lokoraik ne’e. Vila-Vista halo ona jogu dalarua iha grupu E maibé laiha jogu ida mak nia manán, enkuantu Laivai halo ona jogu rua manán ida lakon ida no ekipa ne’e sei iha posibiliade avansa ba oin bainhira manán ou empata kontra ekipa Aimou FC iha jogu tuir-mai.
Vila-Vista FC laiha ona esperansa tanba hela de’it jogu ikus konatra UEP FC, manán mós ekipa ne’e sei la bele ultrapasa basa klube seluk nia pontu boot liu nia.
Jogu entre ekipa rua ne’e hala’o bainhira árbitru fó ona orden, jogadór sira lansa kedan kontra no atake ba malu tuir tékniku no abilidade ekipa idaidak nian.
Husi kontra no atake Laivai hatudu jogu ne’ebé ho velosidade makas halo jogadór Vila-Vista lakon bola barak nune’e iha minutu 2 jogadór Bonarudin Aming (17) lansa ona golu primeiru hodi muda rezultadu ba 1-0.
Golu ne’e halo Vila-Vista tenke servisu maka’as liutan nune’e bele halo empata jogu ne’e. Jogadór sira husi lina ba lina pasa bola ba mai maibé Laivai tenta hamate tutuir Vila-Vista nia jogu.
Nune’e Vila-Vista susar atu halo jogu ne’ebé konfortavél. Maske iha presaun klube ho kodigu Soke Rai-Susar ne’e kontinua hatudu jogu ne’ebé brillante.
Laivai loko-aan iha kampu laran hodi hatudu sira mak forsa liu, maibé Vila-Vista kontinua jogu ho kalma maibé halo presaun ne’ebé maka’as, sutu barak mak avansadu Vila-Vista lansa maibé guarda rede Laivai tenta baku sai no barak mós seidauk kona iha alvu.
Avansadu Laivai mós tenta halo atake makas iha defeza Vila-Vista nian maibé la konsege sobu Vila-Vista nia formatu iha lina kotuk, oportunidade barak mak jogadór Laivai hetan maibé la konsege ezekuta ho di’ak.
Jogu la’o to’o minutu 19 sorte monu ona ba Vila-Vista tanba konsege xoke defeza Laivai nian ne’ebé loko-aan iha kampo laran ikus jogadór Olivio da Costa (10) responde ona golu ida hodi muda rezultadu ba 1-1. Maske adeptus ladun barak hodi apoiu Vila-Vista maibé iha adeptus ida-rua ne’ebé tur iha tribun leten hakilar hodi fó korajen ba sira nia ekipa favoritu maske Laivai ne’ebé iha adeptus ne’ebé barak hodi hakilar halo rame tebes jogu ne’e.
Husi golu ne’e muda ona jogadór Vila-Vista nia mentaliade hodi hala’o jogu ne’ebé bonitu. Atake maka’as halo jogadór Laivai susar atu hetan bola no husi ne’e oportunidade barak mak Vila-Vista hetan atu prodús golu maibé avansadu la ezekuta ho di’ak bola barak mak semo sai liu ba baliza liur, balu kona de’it tian baliza.
Ekipa rua nia atake ba malu hela de’it ho golu rua ne’e, to’o minutu primeira parte termina laiha tan golu ruma mak akontese no rezultadu provizoriu 1-1.
Hakur ba segunda parte ekipa rua nafatin hatudu jogu ne’ebé ho velosidade maka’as, maibé treinadór Vila-Vista haree jogadór Aorcotino da Costa (24) ladun hatudu jogu ho di’ak dada sai hodi substitui fali jogadór Elviano Martins (9) nune’e bele joga fali iha lina oin ka avansadu. Iha minutu 41 Vila-Vista deside hasai mós jogadór Turibio Padua (2) hodi substitui fali jogadór Flavio Ximenes (19).
Jogu la’o ekipa rua halo atake ba malu ho másimu maibé falla atu halo finalidade ho nune’e iha minutu 40 treinadór Laivai desde sda sai jogadór Danilo Alves (55) hodi hatama fali jogadór (77) Elvio Pereira. Maske halo ona mudansa ba jogadór iha lina klaran bo defeza Laivai nafatin la hetan jogu ho di’ak no Vila-Vista halo presaun makas atu hatama hela de’it golu maibé ikus falla iha finalidade.
Nune’e treinadór Laivai deside dada sai tan jogadór Fernando Fernandes (73) hodi hatama fali jogadór Joaquim da Costa (47) iha minutu 48, iha minutu hanesan dada sai mós jogadór Noel dos Santos (12) hodi halo defensivu no atake maka’as hasoru Vila-Vista.
Maibé Vila-Vista nafatin hatudu jogu ne’ebé Extraordinariu halo Laivai susar atu hetan boa, bainhira hetan Vila-Vista hamate tutuir. Tanba ne’e iha minutu 52 treinadór Laivai deside hasai tan jogadór Helio Soares (18) hodi dudu tama fali jogadór Apolinario Santos (69). Husi troka jogadór ne’e konsege mudaaivai nia jogu.
Nune’e iha minutu 55 Vila-Vista deside dada sai jogadór Ludivinho Gomes (5) hodi hatama fali jogadór Heldeu Febriano (11) nune’e bele halo barullu iha lina oin. Maibé seidauk to’o ba Vila-Vist nune’e iha minutu 63 dada sai tan jogadór Nelson Mandela (3) hatama fali jogadór Felisberto Marques (14).
Biar halo mudansa ba jogadór maibé Laivai halo presaun maka’as ba Vila-Vista to’o minutu 65 sorte di’ak monu ba Laivai liuhusi jogadór Bonarudin hodi lansa tan golu segundu hodi hatur metin rezultadu ba 2-1.
Golu ne’e halo Vila-Vista atrapalla maka’as oinsa bele servisu maka’as hodi halo empata jogu ne’e, nune’e iha minutu 74 Vila-Vista dada sai guarda rede Pablo Jesus (13) tanba kondisaun ain la aguenta atu bele termina jogu ne’e, hodi hatama fali guarda rede Jerónimo Alves (25), nune’e haree ba jogu ladun másimu iha minutu 77 Vila-Vista deside hasai tan jogadór Celestino Soares (7) hodi hatama fali jogadór Sabino Cruz (12) maibé nafatin la halo mudansa jogu hodi fó rezultadu pozitivu to’o minutu normal jogu nian termina.
Ho nune’e jogu remata vitoria hela ba Laivai hodi save metin pontu tolu hodi hein jogu ikus hasoru Aimou FC nune’e hodi buka empata no manán atu ultrapasa ba jogu 16 finál. Enkuantu Vila-Vista obrigado tenke save tan derrota la iha direitu absoluta ba pontu tolu no iha nia jogu ikus kontra UEP FC hanesan jogu kompleta.
Notísia relevante: Manán Relay 3-0, Zhavia provizóriu lidera grupu A iha kopa Xanana
Jornalista: Hortencio Sanchez
Editór: Florencio Miranda Ximenes
