DILI, 13 maiu 2024 (TATOLI) – Ekipa futeból Zhavia FC susesu halakon nia adversáriu Relay FC ho rezultadu 3-0, iha jogu kontinuasaun kopa Maun Boot Kay Rala Xanana Gusmão ne’ebé realiza iha Estádiu Munisipál Dili, segunda loraik.
Husi rezultadu ne’ebé Zhavia hetan lori ekipa ne’e ba tu’ur hakmatek iha tabela klasifikasaun provizóriu grupu A ho pontu haat, enkuantu ekipa ne’ebé pontu tuir Zhavia mak Buradu FC ho pontu tolu, Buruma FC ho pontu ida no Relay okupa ikus liu ho pontu zero.
Husi rezultadu ne’e hatudu mo-mós Relay iha zona mean atu elemina ona husi faze grupu tanba durante jogu lakon dalarua tutuir malu, no hela jogu ikus hodi halo kompleta.
Bainhira jogu hahú ekipa rua lansa kedan kontra no atake ba malu tuir tékniku no abilidade ekipa idaidak nian bainhira árbitru Bernardino Mascarinha, juiz liña Duarte Henrique, Elvis Ximenes no árbitru rezerva Francisco Pereira autoriza ona jogu la’o.
Zhavia lansa kontra ne’ebé maka’as nune’e bele fó vitória ba nia ekipa, enkuantu Relay mós hakas aan másimu oinsa hatama golu. Esforsu hotu Relay halo nunka susesu tanba jogadór Zhavia tenta hamate tutuir jogu.
Zhavia ne’ebé lidera husi treinadór Gaspar Amaral utiliza jogu ho modelu ofensivu ka ataka makas iha lina oin Relay nian nune’e bele prodús golu lalais maibé la susesu nafatin tanba Relay mós lansa atake ne’ebé naton maibé la fó fatin ba Zhavia atu prodús golu.
Haree ba lina klaran Zhavia nian ladun hatudu jogu ne’ebé adekuadu iha minutu 40 treinadór deside dada sai jogadór Gabriel Pires (21) hodi hatama fali Raimundo Barreto (22),nune’e bele halo moris lina klran. Maske troka ona jogadór maibé Zhavia nafatin mantein iha nia pozisaun seidauk hatudu jogu ho másimu.
Sutu barak mak avansadu Zhavia halo maibé sutu hirak ne’e hela de’it ho sutu tanba la kona iha alvu, sutu barak mós guarda rede Relay Caitano Gusmão (44) tenta baku sai.
Maske seidauk halo golu, Zhavia tenta halo presaun makas, jogadór sira pasa bola husi ain ba ain, fintas ba fintas mai, maibé tatika hotu Zhavia halo Relay sempre halo mate no susar tebes ba Zhavia atu hanehan klube Manatuto ne’e.
Haree ba forsa ne’ebé hanesan durante minutu 35 ekipa rua la prodús golu no tempu primeira larte nian termina ekipa rua tenke empara provijoriu 0-0.
Hakat ba segunda parte ekipa rua nafatin lansa kontra no atake ba malu, maibé Zhavia domina liu bola halo Relay tenke servisu makas maibé Zhavia halo jogadór Relay la hetan oportunidade atu halo presaun hasoru Zhavia no Zhavia halo jogu meiu kampo.
Tanba Zhavia halo presaun maks iha minutu 40 treinadór Relay deside dada sai jogadór Humberto Marques (8) hodi hatama fali jogadór Mariano Soares (26) hodi halo moris jogu Relay nian maibé la konsge hatudu jogu ne’ebé di’ak tuir treinadór nia hakarak.
Jogu la’o to’o minutu 50 treinadór Zhavia haree jogadór Samuel da Cruz (11) la hatudu jogu ne’ebé di’ak nia dada sai hodu substitui fali defeza karuk Yohanes Gusmão (25) nune’e bele halo moris liutan jogu. Iha minutu hanesan Gaspar dada sai mós jogadór Domingos Americo (9) hodi hatama fali jogadór David Asunção (18).
Husi mudansa jogadór ne’ebé Gaspar halo ikus iha minutu 52 hatudu duni rezultadu di’ak tanba jogadór Jobelquim da Costa (13) konsege fura rede Relay hodi mua rezultadu ba 1-0, golu ne’e halo adeptus Zhavia nian hakilar ho lian makas iha tribun leten provoka adeptus Relay nian ne’ebé tur nonok de’it hodi hateke tanba jogadór Relay ne’ebé la hatudu rezultadu di’ak.
Golu ne’e hamanas liutan Zhavia hodi hatudu jogu ne’ebé brillante iha kampo laran, hodi aperta liutan Relay iha kampo laran.
Haree ba presaun ne’ebé makas, treinadór Relay deside halo mudansa tan jogu hodi dada sai jogadór Mariano da Costa (14) hodi hatama fali jogadór Duarte Gusmão (19). Maske meiu hotu treinadór ne’e halo maibé hetok aat liutan tanba jogadór ne’ebé nia troka ladun antisipa bola ho di’ak.
Ho frakeza ne’ebé iha Zhavia utiliza kedan oportunidade hodi lansa kontra atake ne’ebé makas liutan nune’e iha minutu 71 jogadór Miguel Barreto (10) prodús tan golu ida muda rezultadu ba 2-0.
Ho golu ne’e treinadór seidauk satisfaz no halo mudansa liutan jogu nune’e bele halo defensivu nune’e adversariu labele lansa golu no iha oportunidade bele halo tan golu. Nune’e iha minutu 72 nia dada sai jogadór Raimundo Barreto (22) hodi hatama fali jogadór Norberto Gonçalves (80).
Ho mudansa jogadór ne’e fó duni rezultadu ba Zhavia tanba jogadór Yohanes Gusmão lansa tan golu ida iha minutu 76 hametin rezultadu ba 3-0.
Golu Yohanes nian nu’udar golu vitoria ba Zhavia tanba to’o minutermina laiha tan golu ruma mak akontese vitoria hela metin ho Zhavia no Relay simu derota ho zero.
Notísia relevante: DIT FC ho Relay FC fahe pontu ba malu iha abertura kopa FFTL
Jornalista: Hortencio Sanchez
Editór: Florencio Miranda Ximenes
