DILI, 23 maiu 2024 (TATOLI) – Ministériu Agrikultura, Pekuária, Peska no Floresta (MAPPF) liuhusi Diresaun Peska, Aquikultura no Jestaun Rekursu Aquatikus, konstroi ona sentru viveiru ikan Nila iha Kosteira Klakuk Betanu, Munisípiu Manufahi, hodi sai merkadu ida atubele distribui ikan Nila ba munisípiu sira.
Diretór jerál, Celestino da Cunha Bareto, haktuir katak Diresaun Peska agora daudaun halo hela instalasaun ba sentru viveiru ikan Nila iha Klakuk tanba hakarak atu dezenvolve área Kosteria parte Súl ne’e sai fali merkadu ikan Nila hodi nune’e bele distribui fali ba komunidade sira iha kada munisípiu ne’ebé hakarak haki’ak ikan.
“Ita-nia polítika atu dezenvolve área kosta súl ho dezenvolvimentu sentru viveiru ikan Nila ho kondisaun ne’ebé mais avansadu, tanba ita hakarak halo sentru ne’e sai merkadu ida hodi bele distribui ikan Nila ne’e ba fali komunidade sira iha territóriu nasionál,” Diretór Celestino ba TATOLI iha ninia serbisu fatin MAPPF, Comoro, ohin.
Nia esplika katak Sentru viveiru ikan Nila iha Klakuk ne’e, agora iha ona prosesu konstrusaun nia laran, espera katak tinan ida-ne’e bele finaliza ona hodi nune’e bele dezenvolve ona área referida atu haki’ak ikan Nila ho volume ne’ebé boot liutan tanba área ne’e sei konsidera nu’udar fatin protejidu.
Tuir ezekutivu ne’e katak área ne’ebé maka Diresaun identifika ona atu dezenvolve nu’udar área mariña protejida ne’e kuaze iha ektare hamutuk rihun 99 mak sei sai fatin ba atividade peska sustentavel.
Entretantu, iha ona ektare rihun-59 maka sai ona fatin ba peska sustentavel no kuaze kilómetru ida mak diresaun halo ona konstrusaun ba sentru haki’ak ikan Nila.
Projetu ne’e hetan kooperasaun ho parseiru dezenvolvimentu, Programa Nasaun Unida ba Dezenvolvimentu (PNUD) ne’ebé agora la’o hela ne’ebé ninia fundu detallu ba konstrusaun ne’e parte husi parseiru sira maka iha dadus fiksu kona ba montante osan hira maka aloka ba konstrusaun ne’e. Portantu husi Diresaun rasik konsidera katak depois projetu kosta Súl ne’e kuandu finaliza ona fatin sira ne’e sei konsidera nu’udar área mariña protejida.
Notísia relevante:Hakom haki’ak ikan Nila hodi sustenta nesesidade família
Jornalista: Tomé Amado
Editór: Rafael Ximenes de A. Belo
