KOVALIMA, 21 Outubru 2025 ( TATOLI)-Kompañia Mahoben daudaun ne’e hahú halo ona konstrusaun ba jardín Sekretáriu Rejiaun 12 Outubru “Sesurai” ne’ebé lokaliza iha suku Debos, postu administrative Suai, Kovalima.
Diretór Servisu Munisipál Planeamentu Integradu no Dezenvolvimentu, Carlito Barros Reis, informa Autoridade Munisípiu Kovalima liuhosi Servisu Munisipál Planeamentu Integradu no Dezenvolvimentu (SMPID) utiliza orsamentu poupansa hodi konstrui jardín referidu.
“Empreza Mahoben hahú hala’o ona konstrusaun jardín Sekretáriu Rejiaun 12 Outobru Alvaro de Jesus ho kódigu “Sesurai” tanba liuhosi konkursu públiku faze dahuluk no ba daruak empreza Mahoben Unipessoál Lda ,maka manan iha prosesu konkursu publiku,” nia hateten iha salaun AMC Kovalima, ohin.
Konstrusaun jardín Sekretáriu Rejiaun 12 Outobru Alvaro de Jesus ho kódigu “Sesurai” hahú iha loron 15 fulan-Outobru 2025 ne’ebé sei ramata iha loron 31 fulan-Dezembru 2025 ho valór orsamentu hamutuk $80,211.06.
Daudaun ne’e, Nia hateten Empreza Mahoben Unipessoál Lda, hahú ke’e ona rai hodi konstrui jardín Sekretáriu Rejiaun 12 Outobru Alvaro de Jesus ho kódigu “Sesurai” iha Kovalima.
Kompañia Mahoben Unipessoál Lda, maka manán konkorsu públiku ne’e, tanba priénse kriteria aprovizionamentu Autoridade Munisípiu Kovalima hodi implementa obra ne’e.
“Ho nune’e ami kontinua hala’o konkursu faze ba daruak ne’ebé empreza rua maka tuir konkursu maka hanesan Empreza Savi Guzu no Empreza Mahoben maka pasa iha prosesu aprovizionamentu no daudaun ne’e hahú halo ona konstrusaun,”nia dehan.
Jornalista:Celestina Teles
Editór:Florencio Miranda Ximenes
