COVALIMA, HEADLINE

Hakom haki’ak ikan Nila hodi sustenta nesesidade família

Hakom haki’ak ikan Nila hodi sustenta nesesidade família

Tanke ba haki'ak ikan Nila.

COVALIMA, 30 Abríl 2024 (TATOLI) – Organizasaun Naun-Governamentál (ONG) Haburas Komunidade (Hakom) iha postu administrativu Fatululik no Fohorem hala’o atividade haki’ak ikan Nila ne’ebé nia rezultadu ne’e uza ba sustenta nesesidade família nian.

Hakom estabelese ona grupu tolu no kria ona tanke neen iha postu Fatululik no Fohorem hodi haki’ak ikan no kada grupu iha membru 15.

Objetivu husi haki’ak ikan, tuir Diretór ONG Hakom, Mouzinho da Costa, atu konsome hodi hadi’ak nutrisaun família nian, liuliu ba inan isin-rua, inan fó susu no labarik tinan lima mai kraik ne’ebé fasíl atu hetan má nutrisaun, nomós hasa’e rendimentu família nian.

“Ami haki’ak ikan liuhusi forma grupu no ami hetan apoiu fini ikan hosi Governu Japaun iha tinan 2018 to’o ohin loron ne’ebé bainhira ami kolleta, grupu idaidak bá fa’an hodi hetan osan” , Mouzinho da Costa dehan iha Covalima, ohin.

Nia dehan osan sira ne’ebé grupu hetan uza ba nesesidade família no selu oan sira-nia eskola, tanba moris hanesan agrikultór buka osan liuhosi fila-liman tanba la’e difísil ba moris.

“Ikan ne’ebé ami kolleta fa’an de’it iha postu administrativu Fatululik, nune’e ami hetan lukru ladún di’ak”, nia lamenta.

ONG Hakom eziste ho nia vizaun mak kria kondisaun moris komunidade atu sai prósperu ho ambiente ida ne’ebe moos, saudavel, hakmatek no dame nia laran. Nia misaun mak haforsa organizasaun baze komunitária (OBK) no hasa’e koñesimentu komunidade iha aspetu oioin, tuir kondisaun no haforsa partisipasaun komunidade hodi sai autór ba dezenvolvimentu sustentavel.

Durante ne’e, ONG hasoru dezafiu mak seidauk hetan doadór atu apoia atividade grupu sira-nian, maibé membru grupu entuziazmu hodi hala’o atividade ne’e.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!