DILI, 03 jullu 2024 (TATOLI)—Komisaun F ne’ebé trata asuntu Saúde, Seguransa Sosiál no Igualidade Jéneru iha Parlamentu Nasionál (PN), rekomenda ba Ministériu Saúde (MS) atu aumenta profesionál saúde iha sentru no postu saúde sira iha territóriu.
“Rekomenda ba Ministériu Saúde atu tau atensaun. Haree ba rezultadu fiskalizasaun husi komisaun nian ne’ebé hatudu iha sentru no postu saúde, sei falta rekursu umanu liuliu ba iha médiku, parteira, infermeiru, farmasista sira ho pesoál limpeza no seguransa ne’ebé ita iha,” Prezidente Komisaun F, Maria Gorumali Barreto, hateten ba jornalista sira hafoin ramata audiénsia ho Vise Ministru ba Fortalesimentu Instituisionál Saúde iha Parlamentu, kuarta ne’e.
Ida-ne’e presiza tau atensaun bainhira MS sei iha polítika ba rekrutamentu ba profisionál saúde sira.
Vise-Ministru ba Fortalesimentu Instituisionál Saúde, José dos Reis Magno, hateten tau atensaun ba rekomendasaun komisaun nian kona-ba profesionál saúde sei menus iha fasilidade saúde sira.
“Preokupasaun deputadu sira-nian kona-ba fasilidade sira ita konstrui ona, nia funsionamentu la’o hela maibé iha fatin balun menus profisionál saúde karik afeta problema atendimentu,” nia dehan.
Daudaun ne’e, nia dehan, ezemplupostu saúde iha territóriu hamutuk 342 iha nível suku de’it, signifika tenke rekruta ema 342 ba pesoal limpeza inklui pesoal seguransa ho númeru ne’ebé iha, entaun ne’e presiza orsamentu boot hanesan mós ba profisionál saúde.
Tan ne’e, Governante ne’e dehan, hafoin prosesu rekrutamentu ne’ebé MS hala’o liu ba, no agora MS halo hela analiza atu haree orsamentu sei iha ka lae hodi halo retrutamentu foun, nune’e depende ba orsamentu.
Maibé, preokupasaun públiku no MS nian katak profisionál saúde la to’o nafatin presiza rekruta atu bele 100% tuir ona referénsia ne’ebé iha, maibé pelumenus sira-ne’ebé haree nesesita duni mak tau tan ema.
“Agora, ba oin ami haree munisípiu sira-ne’ebé mak ita tenke tau atensaun makaas mak hanesan RAEOA ema sei falta no Ermera ne’ebé populasaun boot okupa pozisaun datoluk iha Timor-Leste, depois Ainaro no Aileu sira ne’e mós presiza ema nafatin. Ita haree, hanesan Ataúro mezmu nia ho populasaun kiik mais nível munisípiu ona ita presiza ona haree,” nia hateten.
Jornalista : Nelson de Sousa
Editór : Cancio Ximenes
