DILI, 09 juñu 2026 (TATOLI)—Departamentu Forénsiku Hospitál Nasionál Guido Valadares (HNGV) finaliza ona halo autopsia ba matebian Nadine Batista Ribeiro nia mate-isin no entrega hikas ba família.
“Familia matebian kopera tebes ho forensik HNGV, nune’e lori matebian Nadine nia mate-isin mai iha mortuáriu atu halo autopsia, entaun ohin meudia iha tuku 14 ho balun, ita finaliza no entrega ona ba familia atu halo prosesu funebre,” Xefe Departamentu Forénsiku HNGV, Nilton Tilman, dehan ba jornalsita sira iha nia kna’ar mortuáriu, ohin.
Nia relata, tuir kronolojia ne’e matebian ho nia bin tula malu ho motor no lori pasta no dokumentu balun iha laran, depois to’o iha dalan suspeitu na’in-rua asalta no hadau sira-nia pasta, nune’e vitima sira duni tuir suspeitu ho violosidade alta no lakon kontrola, nune’e sira xoke troatoar no vitima sira monu, ida bin ne’e kanek no alin Nadine Batista Ribeiro ho idade 14 mak lakon vida.
“Entaun kazu ida-ne’e kazu krime, entaun Polisia sira tenke submete ba investigasaun kriminál, nune’e sira lori fali matebian nia mate-isin ne’e mai mortuáriu. Tanba familia sira iha kompreensaun di’ak hakarak koopera ho justisa tuir prosedimentu autopsia atu buka tuir kauza husi mate no autór ne’e mós hetan duni pena ida-ne’ebé mak atu hanesan ho saida mak sira lakon sira-nia oan,” nia dehan.
Nia afirma, rezultadu autopsia ne’e sei rekolla hela no fiar katak semana ne’e Forensik entrega rezultadu ba Ministériu Públiku.
“Agora daudaun ami rekolla rezultadu autopsia sira hotu no ha’u fiar katak iha loron 11 fulan-juñu, ita sei entrega ba Ministéru Públiku, nune’e prosesu ne’e bele la’o lalais,” nia dehan.
Antes ne’e, Polísia Nasionál Timor-Leste (PNTL) hamutuk ho komunidade intelinjénsia halo ona detensaun suspeitu na’in-rua (2) hadau telefone iha Praia dos Coqueiros ne’ebé rezulta Nandine lakon vida.
Suspeitu na’in-rua (2) Polísia Nasionál Timor-Leste (PNTL) hamutuk ho komunidade intelijénsia na’in-rua (2) kaptura iha área Dili iha Segunda (08/6) por vota tuku 15h30 iha área Dili laran.
Suspeitu na’in-rua (2) ne’ebé ekipa konjunta kaptura mak ho inisiál JACR no MZX.
Daudaun ne’e, detein suspeitu na’in-rua (2) ne’e iha sela Eskudra Dom Aleixo. Kazu ne’e prosesu ho NUC: 0206/26.PNSIC.
Jornalista : Felicidade Ximenes
Editór : Cancio Ximenes
