DILI, 22 jullu 2024 (TATOLI) – Ministru Defeza Kontra Almirante Donanciano Costa Gomes Pedro ‘Klamar Fuik’, lori Governu Timor-Leste, kongratula Ezersítu Libertasaun Populár Xina ne’ebé hala’o nia aniversáriu ba dala-97 no husu forsa armada Xina hodi hametin liután kooperasaun militár ho forsa armada Timor-Leste.
“Iha ámbitu ida-ne’e, lori Governu Timor-Leste hakarak kongratula ba Ezérsítu Libertasaun Populár Xina ne’ebé ohin halo nia aniversáriu ba dala-97, parabens no votu susesu ba forsa armada Xina. Ho aniversáriu ida-ne’e bele hametin pás iha nivél globál no kontinua promove dame iha mundu”, Klamar Fuik dehan iha ámbitu aniversáriu Ezersítu Libertasaun Populár Xina ba dala-97 ne’ebé hala’o iha Embaixada Xina iha Timor-Leste, Praios dos Coqueiros, segunda, ohin.
Ministru husu ba forsa armada Xina atu kontinua mantein kooperasaun militár hodi apoiu ba dezenvolvimentu forsa defeza Timor-Leste.
“Ha’u hakarak hato’o ami-nia protidaun no determinasaun iha área kooperasaun ho Governu Xina, husu ba Governu Xina atu kontinua apoia Timor-Leste iha área dezenvolvimentu forsa nian no kontinua respeita nafatin ba prinsípiu kooperasaun sira ne’ebé nasaun rua, Timor-Leste no Xina iha ona”, nia afirma.
Klamar Fuik hateten, kooperasaun Timor-Leste no Xina la’o ona desde Timor-Leste nia rezisténsia. Xina hatudu protidaun hodi apoia Timor-Leste hanesan iha área kapasitasaun rekursu umanu, apoia iha área oin inklui infraestrutura, dezenvolvimentu forsa armada Timor-Leste nian.
“Forma ita-nia forsa sira atu sai forsa profisonál iha futuru no ita mós kontribui ba dezenvovimentu infraestrutura militár nian no apoiu mós ba fasilidade iha forsa armada Timor-Leste ida-ne’e mak kooperasaun ne’ebé Xina halo ho Governu Timor-Leste no ha’u hakarak reitera ida-ne’e katak kooperasaun Timor-Leste ho Xina sei kontinua nafatin ho buat sira ne’ebé durante ne’e ita la’o ona ne’e”, nia informa.
Iha fatin hanesan, Adidu Militár Xina, Koronél Miao, hateten Militár Xinés sempre adere ba abertura, inkluzividade no kooperasaun pragmátika. Militár Xinés maka militár ida ne’ebé nakloke, inkluzivu no kooperativu. Militár Xinés adere ba prinsípiu respeitu malu, igualdade, benefísiu mútua no kooperasaun manan-manan, hala’o ativamente interkámbiu no kooperasaun militár internasionál no responde hamutuk ba dezafiu seguransa globál sira.
“Maske ita iha kór kulit ne’ebé la hanesan, lian ne’ebé la hanesan, valór no estílu moris ne’ebé la hanesan, ita moris hamutuk iha ró boot ida, iha ne’ebé ita tenke apoia malu. Nu’udar adidu defeza Xinés iha Timor-Leste, ha’u sei servisu hamutuk ho Ministériu Defeza Nasionál Timor-Leste, Forsa Defeza Nasionál no belun sira husi área hotu hodi hametin liután interkámbiu entre militár rua ne’e, aprofunda kooperasaun prátika no kontinua promove dezenvolvimentu ida estavél no lalais liu ba relasaun entre nasaun rua no militár rua ne’e. Ha’u fiar metin katak perspetiva kooperasaun iha futuru entre Xina no Timor-Leste no mós militár rua ne’e sei sai nabilan liután.
Ezersítu Libertasaun Populár Xina hari’i iha loron 1 fulan-Agostu tinan 1927. Aniversáriu ba dala-97 iha tinan ne’e hala’o iha Embaixada Xina iha Timor-Leste no partisipa husi Embaixadora Xina ba Timor-Leste, Wang Wenli, Ministru Defeza Kontra Almirante Donanciano Gomes Pedro Klamar Fuik, Xefe Estadu Maiór Jenerál F-FDTL Tenente Jenerál Falur Rate Laek, Xefe Estadu Maiór Forsa Armada Brigadeiro Jenerál José da Costa Trix, Komandante Komponente Navál Komodoro Higinio das Neves, Majór Jenerál Cornelío Ximenes ‘Maunana’ no Ofisiál no Superiór F-FDTL balun no Komandante Jerál PNTL, Komisáriu Jerál Henrique da Costa, ofisiál PNTL, Diretór Jerál PCIC Vicente Brito inklui entidade balun.
Jornalista: Natalino Costa
Editór : Zezito Silva
