DILI, 05 Agosto 2024 (TATOLI) –Polísia Nasionál Timor-Leste (PNTL) munisípiu Dili simu orientasaun hodi halo operasaun konjunta hahú husi fulan-Agostu hodi garante situasaun iha kapitál hakmatek iha ámbitu vizita Papa Francisco nian bele la’o ho di’ak.
Komandante PNTL Dili, Superintendente Xefe Polísia Orlando Gomes, dehan sorumutu ne’e hamutuk ho komandante polísia eskuadra sira, tanba iha ona orientasaun ne’ebé hato’o ona ba komandante eskuadra sira atu halo koordenasaun serbisu ho FALINTIL-Forsa Defeza Timor-Leste (F-FDTL) hodi hamutuk halo operasaun konjunta iha Dili.
“Ita orienta ona komandante sira hotu iha eskuadra sira atu hamutuk ho Forsa Defeza Timor-Leste hala’o ona operasaun konjunta iha tempu kalan bá fatin sira ne’ebé identifikadu risku ba problema”, Komandante Orlando Gomes hato’o, ohin.
Tanba ne’e, hahú husi fulan ne’e Polísia hamutuk ho F-FDTL sei realiza operasaun konjunta la’o ain no halo patrullamentu ho karreta hodi halo prevensaun ba konflitu no krime sira. “Alvu komandu Polísia no F-FDTL nian hakarak hahú husi Agostu ba oin asuntu kona-ba krime ka konflitu tenke redús iha kapitál”, nia afirma.
Tuir Orlando Gomes, krime ka konflitu sei la tama iha negosiasaun, tanba bainhira iha operasaun konjunta ne’e maka identifika mosu kazu sira maka forsa seguransa rua ne’e sei foti asaun ida rigoroza hasoru ema sira ne’ebé komete krime.
“Ita husu ba komunidade, joven sira, inklui grupu ne’ebé de’it maka tenta halo asaun krime iha fulan ida ne’e ba oin, komandu forsa rua sei la tolera atu sira ne’e. Tanba servisu komandu rua nian iha tempu kalan ne’e atu lori sidade Dili sai hakmatek hodi garante vizita Papa Francisco nian mai ita-nia rai”, nia salienta.
Tanba ne’e, Superintendente Xefe Polísia apela atu ema hotu iha kapitál hamutuk hodi apoia operasaun konjunta ida ne’e hodi asegura situasaun iha Dili sai hakmatek hodi simu Papa Francisco ho kontente.
Lembra katak F-FDTL no PNTL formaliza ona, iha 17 Jullu, akordu operasaun konjunta ho naran “Pombu Mutin” hodi garante seguransa ba vizita Papa Francisco iha país, entre loron 09 no 11 Setembru.
Notísia relevante: Infografia: PNTL Dili rejista krime 388, maioria iha Dom Aleixo
Jornalista: Tomé Amado
Editora: Maria Auxiliadora
