DILI, 11 setembru 2024 (TATOLI)—Sua Santidade Amu Papa Francisco hateten, durante loron tolu hala’o vizita Estadu no pastorál iha Timor-Leste durante loron tolu (09-11 setembru) iha Dili, sempre hasoru joven no povu ida-ne’ebé hatene hamnasa ho ema seluk.
“Iha buat rua ne’ebé toka loos ha’u-nia fuan. Bainhira ha’u la’o iha dalan sira Dili laran ne’e, juventude ho hamnasa, imi povu ida-ne’ebé hatene hamnasa no kontinua hanesan ne’e. Joven ida tenke hatene mehi. Saida mak ita tenke halo atu bele iha mehi, la’ós atu hodi hemu alkóliku ka ida-ne’e sei fó ba imi mehi aat. Ha’u konvida imi atu mehi kona-ba buat boot sira iha moris. Joven sira-ne’ebé lahatene mehi, joven sira-ne’e hanesan reforma ona husi moris,” Papa hato’o iha diskursu bainhira hala’o enkontru no joven timoroan iha Sentru Konvensaun Dili (CCD, siglá portugés), kuarta ne’e.
Joven sira-nia moris ne’e to’o iha dalan klaran, Santu Padre hateten, entre moris labarik no ema katuas no ferik nian, tanba rikusoin furak liu iha sosiedade ida-ne’e nia laran ne’e mak ema katuas no ferik hoo avó sira.
Iha moris rohan ida iha labarik sira-nia moris no rohan seluk iha katuas no ferik sira-nia moris, maibé sira-ne’ebé mak katuas no ferik ne’e mak fó matenek sabedória ba joven sira.
“Imi sira-ne’e respeita katuas no ferik sira ka lae. Ema katuas no ferik sira husik hela nafatin istória ba foinsa’e sira. Iha sosiedade ida-nia osan mean mak labarik sira no katuas ho ferik sira. Agora imi repete, saida mak osan-mean boot rua iha sosiedade ida; labarik no ferik ho katuas sira,” nia hateten
Tanba ne’e, sosiedade ida iha labarik barak hanesan Timor-Leste nian ne’e, tenke kuida didi’ak labarik sira no iha katuas no ferik sira-ne’ebé mesak memoria sosiedade nian, tanba ne’e tenke respeita no tau matan ba sira.
Amu Papa Francisco mó haktuir istória id aba juventude Timor-Leste katak; Iha família ida, sira han hamutuk ho sira-nia inan-aman, oan no avó sira-ne’ebé idózu loloos ona, maibé avó ne’e idade liu ona no ninia liman ne’e nakdedar, no bainhira atu han mós susár tebes.
“Nune’e, nia aman deside tau meza ki’ik ida iha dapur, atu avó ne’e haan iha de’it iha dapur laran. Nia aman ne’e esplika katak, tau sees tiha nia ba dapur laran, agora ita bele konvida bainaka sira mai haan hamutuk atu labele halo moe ita iha uma laran. No, loron ida nia aman fila, hetan nia oan ki’ik-oan tinan lima ne’e halimar hela ho ai ida. Nia aman husu ba labarik ne’e; ‘ó halo saida ho ai ne’e’. Labarik ne’e hatn; ‘ha’u halo meza ida ne’e, ha’u halo ba apa para apa aban bainrua katuas ona ne’e, ha’u tau sees tiha hodi han ketak,” Papa konta tuir.
Nune’e, Santru Padre haktuir, dala ida tan husu ba joven sira-ne’ebé partisipa enkontru saida mak osan mean rua importante liu iha sosiedade ida, mak labarik ki’ik ho ferik no katuas.
“Favór ida tau matan ba labarik sira no katuas no ferik sira,” nia apela.
Iha imi joven sira-nia kbaas lori istória ne’ebé markadu ho terus boot, maibé mós ho ezemplu furak fi’ar nian kona-ba martir no liuliu kona-ba perdaun no rekonsialiasaun.
Joven sira hanoin didi’ak, pergunta ida iha istória tomak sé mak iha liu kapasidade atu perdua no rekonsilia atu hadame, sé mak ne’e.
“Jesus! Rekonsialiasaun ida-ne’e rekomenda ba ita hotu liuliu ba foinsa’e sira hotu buat tolu (3) mak (1) liberdade, (2) kompromisu no (3) fraternidade.
Pontu dahuluk kona-ba liberdade, iha lian tétun dehan ukun rasik-aan, ne’e mak kapasidade atu ukun no organiza aan, foinsa’e ida-ne’ebé lahatene ukun no tau matan ba nia aan rasik ne’e mak saida.
“Joven ida hatene halo serbisu ne’e mak foinsa’e ida-ne’ebé hadomi hamutuk ho ema seluk no responsabilidade ne’e joven ida-ne’ebé hadomi nia rai no nia pátria,” nia hateten
Amu Papa dehan, joven na’in-tolu (3) ne’ebé ohin fó sasin sira dehan buat ida komun oinsá atu tau matan ba uma komun, oinsá juventude hatene liberdade la signifika halo sá de’it ne’ebé nia hakarak.
Maibé, Papa hateten, signifika joven ida-ne’ebé iha responsabilidade apreende tau matan ba uma komún, tanba ne’e joven ida tenke iha kompromosiu ba nia aan.
Iha probervíu oriental ida-ne’ebé dehan, tempu defísil sira hamosu ema forte sira noa haree de’it inan-aman no avó sira-ne’ebé enfrenta tempu ne’ebé defísil atu bele hetan liberdade, husi sira-ne’e joven tenke apreende oinsá atu maneja tempu defísil iha moris.
Jornalista : Nelson de Sousa
Editór : Cancio Ximenes
