DILI, 19 setembru 2024 (TATOLI)—Prezidente Parlamentu Nasionál (PPN), Maria Fernanda Lay, hateten nia parte hato’o ona keixa hasoru eis Deputadu sira iha lejislatura liubá ne’ebé la entrega fali krareta hamutuk 35 ba Prokuradória Jerál Repúblika (PJR), hodi halo investigasaun atu bele prosesa ba Tribunál no deside estatutu karreta hirak ne’e.
Nia dehan, antigu Deputadu sira la entrega fali karreta hamutuk 35 ba PN bainhira la re-eleitu iha lejislatura tuir mai.
“Maiória kareta 35 eis Deputadu la fó fila, halo ami konfuzaun dezde lejislatura dahaat, tanba sira ne’ebé la re-eleitu kareta ne’e sira selu ona, ida-ne’e la loos. Prosesu ami hatama hela ba Prokuradória Jerál Repúblika (PJR). Espera katak, sira prosesa ba Tribunál hodi deside estatutu kareta sira-ne’e, nune’e depois halo leilaun, se lae, eis Deputadu sira fó tiha ona osan karreta sira-ne’e iha sira-nia podér la fó,” Nia hateten ba jornalista sira iha resintu PN, kinta ne’e.
Aleinde ne’e, iha karreta balun mak antigu deputadu sira fó fila ba PN maibé dokumentu karreta nian sira la fó fila.
“Ha’u labele deside buat ida dezde lejislatura datoluk akontese. Agora, fila ba boa-vontade ita-nian atu fó fila, maibé até agora karreta 35 ne’e sei iha li’ur hela,” nia dehan.
Jornalista : Nelson de Sousa
Editór : Cancio Ximenes
