DILI, 23 setembru 2024 (TATOLI)—Universidade Nasionál Timor-Lorosa’e (UNTL) hahú disemina ona informasaun kona-ba asesu iha ensinu superiór públiku, desde inísiu fulan-setembru to’o ezame finál, hanesan atividade ne’ebé akontese molok tama iha tinan letivu foun.
“Ami halo tiha diseminasaun, nomalmente antes tama anu letivu foun Ministériu Ensinu Superiór Siénsia no Kultura (MESSK), UNTL no Institutu Politéknika Betano (IPB) liuhusi Komisaun Asesu Ensinu Superiór (KAES), ne’ebé tinan-tinan alunu foun tama, sempre halo sensibilizasaun uluk kona-ba kritériu sira,” Vise-Reitór Asuntu Akadémiku no Garantia Kualidade husi UNTL, Samuel Freitas, hateten iha ninia knaar fatin, UNTL, segunda ne’e.
Ekipa responsável sira halo diseminasaun ona iha munisípiu sira, iha Baucau realiza ona iha loron 17 to’o 19 setembru.
“Ita ba halo ne’e la’ós ba diretór eskola maibé envolve mós xefe suku, xefe aldeia, reprezenta veteranu, no hakbiit nia reprezentante. Ita ba dehan ne’e atu oinsá estudante tama iha UNTL kona-ba kritériu sira. Depois diseminasaun ita fó kedas data inskrisaun, liu tiha mak diretór eskola sei partilla ba estudante sira iha kada eskola tanba labele to’o eskola hotu tanba iha eskola barak,” nia akresenta.
Notísia relevante : MESSK divulga informasaun ba estudante sira asesu ba UNTL no IPB
UNTL hakarak ema méritu ka ema hotu tama no inkluzaun, ne’ebé sai hanesan matadalan ba inskrisaun.
“Entaun, ita disemina rejime jerál no rejime espesiál. Rejime jerál ba sira finaliza agora no rejime espesiál iha kanál 16. Polísia Nasionál Timor-Lorosa’e iha laran, veteranu nia oan, ema kbiit laek nia oan iha laran, no sira ne’ebé tinan-haat la konsege tama no koko fali atu tama,” nia esplika.
Tuir Vise-Reitór, UNTL seidauk iha konkluzaun ne’ebé kada tinan hatudu ema hirak maihusi rejime espesiál mesak ladi’ak de’it ka chumba barak.
“Bele iha ida-rua, maibé UNTL seidauk halo konkluzaun agregada, no seidauk halo peskiza. Primeiru persentajen oituan de’it, baibain ita aloka 70% ba rejime jerál, entaun sira-ne’e hadau 30%. Depois entre sira kada kanál hadau malu, tanba ne’e mak veterenu nia oan sira tenke ezame. Ida-ne’e pertinente tenke halo peskiza. Entre dosente ka parte ministériu mak hakarak halo peskiza ba susesu estudante tama iha rejime espesiál. Depois ita haree sira-nia nota iha primeiru anu, kompara seluk,” nia relata.
Iha fatin ketak, Reitór UNTL, João Soares Martins, informa, objetivu diseminasaun informasaun ne’e tanba iha Timor-Leste iha de’it institutu públiku ida hanesan IPB no universidade públliku hanesan UNTL.
“Selu propina baratu, ita mós iha ensinu kualifikadu, tanba dosente sira barak mak mestradu no doutoramentu, inklui fasilidade sufisiente ba estudante sira,” Reitór dehan.
Nune’e mós, Diretór Diresaun Nasionál Ensinu Superiór iha MESSK, Higino Alves, husu ba diretór no reprezentante kada eskola inklui autoriedade lokál sira iha munisípiu Ermera to’o suku sira atu hatutan informasaun ho didi’ak ba joven no estudante finalista sira.
“Ha’u husu ba Diretór eskola sira iha ne’e, reprezentante sira no autoriedade lokál atu kontinua hatutan informasaun ne’e ho didi’ak ba joven no finalista sira ne’ebé mak ramata eskola no hakarak mai kontinua iha ensinu superiór públiku hanesan UNTL no IPB,” Diretór fó sai.
Jornalista : Osória Marques
Editora : Julia Chatarina
