Komisaun G sujere atu entrega Programa Merenda Eskolár ba fali ME
DILI, 10 Juñu 2026 (TATOLI) – Komisaun G iha Parlamentu Nasionál, ne’ebé trata Asuntu Edukasaun, Juventude, Desportu, Kultura no Sidadania, rekomenda ba Governu atu entrega filafali Programa Merenda Eskolár ba Ministériu Edukasaun (ME), liuhusi Diresaun Edukasaun Sentrál Munisipál mak jere fali.
Sekretáriu Komisaun G, deputadu Mateus da Cruz hato’o sujestaun ne’e tanba durante fiskalizasaun Komisaun nian iha terenu identifika problema barak, liuliu falta jestaun ne’ebé di’ak.
Deputadu husi Bankada Kongresu Nasionál Rekonstrusaun Timorense (CNRT, sigla portugés) ne’e dehan iha eskola balun implementa tarde programa ne’e durante fulan tolu no balun liu, depois nia menú la tuir rekomendasaun ne’ebé iha, utilizasaun produtu lokál barak mak la tuir padraun no kestaun seluk tan.
Programa Merenda Eskolár antes ne’e ME mak jere, maibé daudaun entrega ona ba Ministériu Administrasaun Estatál (MAE), liuhusi Autoridade Munisípiu sira relasiona ho desentralizasaun administrativa.
“Komisaun rekomenda di’ak liu filafali ba Ministériu Edukasaun mak jere hanesan uluk, ladún iha problema”, nia hato’o.
Komisaun sujere atu haree regra implementasaun programa, nune’e labele afeta ba empreza sira ne’ebé sai hanesan fornesedora produtu ba merenda eskolár.
Antes ne’e, Xefe Departamentu Asaun Sosiál Eskolár no Merenda Eskolár iha Ministériu Edukasaun, Belchior Maria Almeida Barros, hateten programa ne’e balun hahán aat, la tuir menu, balun seidauk la’o, tanba falta monitorizasaun husi Prezidente Autoridade Munisipál (PAM) idaidak.
Lembra katak Programa Merenda Eskolár iha Timor-Leste regula liuhusi Dekretu-Lei númeru 61/2022 no Dekretu-Lei númeru 71 (nu’udar kódigu enkuadradór). Diploma sira ne’e define katak, porsentu 75 husi orsamentu merenda eskolár tenke uza hodi sosa produtu lokál husi agrikultór sira, hodi garante nutrisaun ba estudante no promove ekonomia lokál.
Benefisiáriu ba Programa Merenda Eskolár iha munisípiu hotu, iha tinan 2026, hamutuk 330.830, kompostu husi feto 160.926 no mane 169.904.
Notísia relevante: http://ME konsidera Programa Merenda Eskolár falta monitorizasaun husi
Jornalista: Nelson de Sousa
Editora: Maria Auxiliadora
