DILI, 02 outubru 2024 (TATOLI)–Uniaun Europeia (UE) Timor-Leste fó apoiu finanseiru ba Rede Feto Timor-Leste hamutuk rihun $130-resin hodi realiza atividade konferénsia munisipál no kongresu nasionál iha tinan ida-ne’e.
Prezidente Konsellu Diretora Rede Feto Timor-Leste, Zelia Fernandes, hateten Uniaun Eureopeia no Rede Feto halo aproximansaun ba malu no aprezenta proposta hodi bele asesu ba iha fundu.
“Iha semana kotuk ami asina ona akordu ne’e ho Uniaun Europeia ho valór boot iha programa konferénsia munisipál no kongresu nasionál Rede Feto Timor-Leste ninian. Montante UE aprova ona ba iha Rede Feto Timor-Leste atu realiza atividade sira-ne’e mak hamutuk liu rihun $130 hodi finansia konferénsia iha munisipiu 12 no Rejiaun Administratiivu Espesiál Oé-Cusse (RAEOA),” Prezidente Rede Feto Timor-Leste, Zelia Fernandes, hateten iha nia diskursu, iha Caicoli.
Prezidente mós apresia no agradese ba UE ba apoia finanseiru jenerozu ba Rede Feto Timor-Leste hodi bele halo atividade organizasaun nian.
“Ami apresia tebes ho Uniaun Europeia nia apoiu, hanesan ami nota katak UE iha kompromisu forte tebes ba asuntu promosaun igualdade jéneru no empoderamentu feto liuhusi apoiu oioin, hanesan Inisiativa Spotlight, empoderamentu feto no advokasia ba asuntu direitu feto. Ami ho kontente atu hateten katak apoiu husi UE signifikativu tebes ba Konferénsia Munisipál Feto iha munisípiu 13, ne’ebé sei hala’o durante semana neen no pontu ikus husi konferénsia ne’e mak Kongresu Nasionál Feto nian,” nia dehan.
Iha fatin hanesan, Adjuntu Xefe Misaun Uniaun Europeia iha Timor-Leste, Christoph Sorg, hateten UE kontente tebe-tebes hodi apoiu Rede Feto Timor-Leste ho objetivu ida mak atu reforsa kapasidade no papél sosiedade sivil iha Timor-Leste, tanba sosiedade sivil bele ajuda timoroan sira iha nível baze iha munisipiu sira.
Sisiedade sivil bele funsiona bazeia ba esperiénsia sira-ne’ebé mak sei hetan iha munisipiu sira hodi hala’o advokasia ba interrese ema hotu-hotu nian hanesan advokasia ba Governu sentrál no fornese sujestaun no rekomendasaun sira atu dezenvolve polítika no lei sira.
Rede Feto no nia membru sira iha ninian dezempeñu servisu sira-ne’ebé di’ak tebes, bainhira ko’alia konaba pozisaun feto iha Timor-Leste.
Motivasaun seluk mak envolvimentu faktu katak ami hakarak haforsa pozisaun feto iha nasaun ida-ne’e, tanba ida-ne’e nesesáriu nafatin atu luta hasoru dezigualdade ne’ebé mak eziste iha sosiedade Timor-Leste nia le’et.
Dezigualdade eziste iha forma barak husi violénsia bazeia ba jéneru até dezigualdade direitu propriedade feto sira-nian.
Programa eMpodera iha ekonomia sai baze ida hodi bele reforsa feto sira-nia independénsia ekonomia atu responde ba nesesidade uma laran.
Ida ne’e Rede Feto envolve feto sira iha munisipiu hotu no ida-ne’e importante tebes, tanba preokupa sira-nia direitu no enkoraja atu ezerse sira-nia direitu.
Jornalista : Jesuína Xavier
Editór : Cancio Ximenes
