DILI, 22 Maiu 2026 (TATOLI)—Komisaun Antí-Korrupsaun (CAC, sigla portugéz) prevee osan $136.560 atu dezeña futuru konstrusaun edifísiu, ne’ebé lokaliza iha Palapasu.
Komisáriu CAC, Rui Pereira dos Santos, informa, empreza Kairi Consultan EDM VHD husi Malázia, konsórsiu ho empreza timoroan Linear Unipesoal, Lda sai manan-na’in ba obra ne’e.
“Dezeñu ne’e ba durasaun fulan-tolu de’it, kuandu hotu ona CAC sei aprezenta ba Komisaun Aprovizionamentu hodi loke konkursu,” Rui Pereira hato’o iha edifísiu CAC, Farol, Sesta ne’e.
Aleinde ne’e, sei aprezenta mós ba Ministériu Planeamentu no Investimentu Estratéjiku (MPIE), Sekretariadu Grande Projetu (SGP) inklui Konsellu Administrasaun Fundu Infraestutura (KAFI) atu avansa ba lansamentu.
“Empreza ne’ebé dezeñ edifísiu CAC ne’e sira sei kumpre ba kontratu ne’e,” nia akresenta.
Notísia relevante : Komisáriu CAC Rui Pereira dezmente informasaun iha dezentendimentu serbisu ho MP
Dezeñu ne’ebé halo detalladu no kompletu kedan ho Bill of Quantity (BoQ), nune’e parte CAC komunika ho ministériu relevante hodi aselera prosesu hodi bele hakat ba lansamentu konstrusaun.
CAC prevee orsamentu hamutuk millaun $9 iha Orsamentu Jerál Estadu (OJE) 2026 ba konstrusaun edifísiu.
Tuir dezeñu, edifísiu ne’e ho pizu lima, kompostu husi kuartu 100-resin, ne’ebé iha sala enkontru bele akomoda ema atus resin, sela detensaun lima inklui sala ba investigasaun.
Komisariu dehan, edifísiu CAC ne’e importante no nesasáriu tebes tanba prepara ba kondisaun tinan 2029, ne’ebé nu’udar uma-na’in ba CAC nível ASEAN nian.
Iha fatin hanesan, Project Coordinator empreza Linear Unipesaoal Lda, Ercilia Maria hateten, garante katak iha fulan-tolu nia laran sei finaliza dezeñu.
Rekorda fali katak, iha tinan 2014, Ministériu Justisa atribui ona rai ba CAC hodi harii edifísiu, nune’e instituisaun independente ne’e kontrata empreza internasionál husi portugal hodi halo dezeñu, maibé empreza internasionál ne’e la konsege konklui to’o ramata, nia konklui de’it inception report, intering report no final draf report, enkuantu final report la konsege.
“Tuir loloos ne’e final report ne’e kama’an ona maibé la konsege. Iha Komisáriu Adérito de Jesus Soares nia dezeñu depois mai iha Komisáriu Adérito Tilman, Komisáriu agora sai hanesan Adjuntu ne’e ami konsege to’o iha faze draf final report. Maibe depois Komisáriu sesante, Sergio Hornai nia tempu komunikasaun ho parte empreza karta ba mai email la mai koopera ho komisaun CAC, entaun ita bele konsidera katak abandonadu, empreza la la konsege konklui finl report,” nia konta tuir.
Iha Dezembru 2024, Komisáriu Rui Pereira hapara kontratu ho empreza anteriór.
Jornaliasta : Natalino Costa
Editora : Julia Chatarina
