DILI, 20 Fevereiru 2026 (TATOLI)—Komisáriu Komisaun Antí-Korrupasaun (CAC, sigla portugéz), Rui Pereira dos Santos, dezmente informasaun ne’ebé mak hateten katak CAC no Ministériu Públiku (MP) iha dezentendimentu serbisu bainhira atende kazu korrupsaun.
Ho situasaun ne’e maka MP avoka ona prosesu investigasaun ba kazu korrupsaun sira ne’ebé CAC remete ona, maibé to’o agora MP la delega fali atu kontinua halo investigsaun.
“Ida-ne’e Komisáriu labele komenta tanba Prokuradór Jerál ninia fatin, purtantu sira iha razaun, avoka ne’e tanba sira bele haree serbisu ne’ebé ita la’o ne’e to’o iha ne’ebé, depois sira haree mak haruka filafali mak CAC sei finaliza relatóriu sira ne’e no sei haruka filafali,” Komisáriu Rui hateten ba jornalista sira hafoin asiste serimónia aniversáriu ezisténsia CAC ba dala-XVI, iha edifísiu CAC Farol, Sesta ne’e.
Notísia relevante : Prokuradór Nelson rejeita la delega kompeténsia ba CAC halo investigasaun ba korrupsaun
Relatóriu korrupasaun tinan 2025 hamutuk 27, neen mak CAC haruka ona ba MP iha Janeiru 2026, iha balun iha faze investigasaun.
“Ita espera bainhira husi Ministériu Públiku bele re-delega fali mai CAC hodi bele finaliza. Tanba CAC tenke buka serbisu hamutuk ho órgaun Polísia Kriminál sira, na’in mak Ministériu Públiku, ne’ebé laiha problema entre CAC ho Ministériu Públiku,” nia afirma.
Komisáriu dehan, MP labele halo fali avaliasaun serbisu ba CAC nu’udar institusaun ne’ebé kada tinan halo rasik avaliasaun ba nia-an, susesu no frakeza atu hadi’a, hanesan mós MP iha regra.
“Purtantu hanesan ne’e, atu klarifika ba públiku, laiha dezentendimentu entre Komisaun Antí-Korrupasaun ho Ministériu Públiku, buat kiikoan sira ne’e normál,” nia tenik.
Jornalista : Natalino Costa
Editora : Julia Chatarina
