DILI, 17 outubru 2024 (TATOLI)–Empreza Bobolait hein Autoridade Munisipal Dili rezolve ho familia matebian sira-ne’ebé hakohi mate iha semitériu Santa Crúz atu bele muda rate sira konstrui iha dalan, atu loke dalan ida ba saudozu Sebastião Gomes nia kampa.
Notísia Relevante: Governu sei muda rate sira iha dalan ba Sebastião Gomes nia kampa
“Ida rate ne’e, até a data, seidauk iha kontinuasaun atu muda (sobu) ka la sobu ne’e laiha. Husi Munisípiu Dili tau avizu iha Facebook maibé laiha ema ida atu sobu nia rate. Empreza kontinua hela obra iha Santa Crúz maibé seidauk hatene familia ba sobu rate atu loke dalan ida ba saudozu Sebastião Gomes nia kampa,” Diretór Empreza Bobolait Unipesoál, Lda, Carlito Pereira, ba Agência TATOLI, kuarta ne’e.
Nia hateten, daudaun ne’e empreza Bobolait hein hela Autoridade Munisípiu Dili atu tau matan tanba AMD mak iha kbiit atu muda rate.
“Ami halo serbisu de’it. Bainhira rate sira-ne’e sobu hotu ona mak ami halo. Se la sobu nafatin ne’e, ami hein de’it,” nia dehan.
Asesór empreza Bobolait Unipesoál, Lda, Helio Moniz Amaral, hateten obra ne’e empreza halo ona osoáriu rua, moru portiku no dalan tama nian tolu (3) no ba kapela nian no li’ur ne’e hein monta lampu.
“Hein mak tau monumentu ka estátua ba iha portiku nian no ida iha laran rate nian. Dalan ba kapela nian ne’e agora empreza fui no nahe daudauk ona simente no azulezu. Estátua ida iha oin no ida mós tau iha laran. Estátua ne’e, empreza servisu hamutuk ho Governu no agora verifika hela iha Portugál,” nia dehan.
Helio Moniz Amaral hateten, kompañia mós hetan obra adisional hodi dada bee ba iha osoáriu nian iha semitériu Santa Crúz.
“Ami-nia problema boot mak rate ne’e de’it. Se Autoridade Munisípiu Dili mak rezolve ona ne’e, entaun kuaze hotu ona. Ami kontratór de’it hodi ezekuta serbisu, desizaun ne’e husi sira,” asesor ne’e hateten ba Agência Tatoli iha Santa Crúz, kuarta ne’e.
Nia esplika, família sira husi matebian sira-ne’ebé hakohi iha ne’ebá la mosu iha semitériu atu sobu ka hasai sira-nia rate sira-ne’e.
“Ema na’in la mai ida, ema sobu ne’e la barak dalaruma 20-resin ba saudozu Sebastião nian. Balun sobu no balun kona uitoan, se kona-ba sentimetru 60,” nia dehan.
Kona-ba ida-ne’e, dirijente ne’e dehan, proposta ne’e empreza hatama ona Komité 12 Novembru no AMD, husu kona-ba família matebian balun sobu ona rate ne’ebé taka dalan atu hadi’a ne’e, seidauk sobu.
Jornalista : Jesuína Xavier
Editór : Cancio Ximenes
