DILI, 20 setembru 2024 (TATOLI)–Prezidente Autoridade Munispíu (PAM) Dili, Gregório Saldanha, sesta ne’e, hala’o sorumutu ho familia rate sira-ne’ebé iha área Kapela Santa Crús nia kotuk to’o saudozu Sebastião Gomes nia kampa.
Enkontru ne’e, ho objetivu atu halo transladasaun ba rate hamutuk 20-resin ne’ebé iha dalan atu ba Sebastião Gimes nia rate, maibé rate balun naran seidauk iha lista, tanba ne’e sei prosesu fali idenfikasaun.
“Dalan husi kapela kotuk ne’e, ita atu haree fali fatin seluk tanba ita sama rate sira-ne’e no ita ladún fó valor ba rate sira-ne’e. Entaun, Governu liuhusi Komite 12 Novembru ko’alia ho família atu halo mudansa ruma, hodi tau iha osoária ka fatin seluk. Ohin, enkontru ne’e atu hetan konkordánsia ho familia kona-ba planu ida ne’e,” Gregório Saldanha hateten ba jornalista sira liuhusi konferénsia imprensa ne’ebé hala’o iha Salaun B Edifísiu AMD, Matadoru.
Nia dehan dehan, iha enkontru ne’e familia barak la halimar, iha balun konkorda no balun la konkorda ne’e respeitu nafatin, maibé desizaun tenke foti nafatin tanba planu iha ona no AMD kontinua kordena ho familia sira.
“Balun ko’alia kona-ba kultura no fiar ne’e ita respeitu. Maibé objetivu ne’e la’ós dalan ba Sebastião nian de’it maibé alarga dalan ba rate sira seluk, atu ita labele sama matebian sira-nia rate. Ita re-ordena fali rate sira-ne’e. Ida-ne’e mak kontestu jerál Governu nian,” nia dehan.
Reprezentante famíli rate iha Santa Crús, Antonino Bianc, hateten nia parte la konkorda ho planu Governu nian atu muda ka translada rate sira-ne’e ba fatin seluk, tanba rate ne’e hela rai de’it ona.
“Ha’u la konkorda atu muda ha’u-nia oan rua ne’ebé haloot iha ne’ebá, tanba ema mate nia uma mak rat. Agora, ita sobu fali nia uma ne’e, ita dezenvolve ba ema moris, la’os ema fila ona ba mundu seluk. Entaun, ita labele book fali ema nia uma, tanba ita-nia kultura hanesan ne’e. Kultura mate ne’e boot-liu mak ne’e. Misa dalaruma ema la bá, maibé loron matebian ne’e kuaze ema nakonu. Se hakarak valoriza mak rega de’it, loroloron ba fase de’it hamoos de’it, kuda ai-funan, la’os atu ba sobu tun-sa’e,” familia matebian ne’e hateten.
Tuir nia, dalan kiik-oan sira-ne’e iha ona no ida-ne’e la’ós projetu, ba fali loke dalan iha rate nian, tanba iha ne’ebá dalan kiik-oan sira iha ona.
“Tanba ne’e mak ha’u lakonkorda atu hasai ha’u-nia oan nia rate. Ha’u mós kaer lisan, ha’u nia ema mate hakohi ona iha rai ne’e labele book. Ita ba raut nia isin iha ne’ebé. ema ba ona Maromak, isin nakfilak ba ona rai, ita ba raut saída, ne’e labele,” nia dehan.
Nia sujere ba Governu atu hadi’a di’ak no rega loro-loron, kuda ai-funan no hadi’a kapela atu ema bele ba reza iha ne’eba tanba ida-ne’e mak valoriza ema-nia klamar.
Jornalista : Jesuína Xavier
Editór : Cancio Ximenes
