DILI, 03 Juñu 2026 (TATOLI) – Reprezentante Povu iha iha Parlamentu Nasionál konsidera alterasaun Kódigu Penál hodi kriminiza difamasaun, insestu no asédiu seksuál la fó impaktu ba produtu jornalístiku ne’ebé prodús husi jornalista sira.
Xefe bankada Kmanek Haburas Unidade Nasionál Timoroan (KHUNTO), Deputadu António Verdiál de Sousa, esplika inisiativa parlamentár ne’e ho objetivu atu altera Kódigu Penál hodi kriminaliza difamasaun, injuria no asédiu seksuál, sei la fó impaktu ba produtu jornalístika no liberdade imprensa iha Timor-Leste.
“Lae, hotu-hotu nia sei la limite ida. Importante mak ne’e hotu-hotu tuir regra ne’e, tanba regra laiha ita halo tuir ita-nia hakarak, bainhira tuir regra laiha limitasaun. Jornalista iha direitu plenutude atu halo serbisu saida de’it, laiha impaktu,” nia hateten iha Parlamentu, kuarta ne’e.
Komisaun A ne’ebé trata Asuntu Konstituisionál no Justisa, hahú halo audiénsia públika ho bankada parlamentár CNRT, PD no KHUNTO sira-nia fundamentasaun ne’ebé nu’udar proponente ba projetu lei númeru 17/VI terseira kona-ba alterasaun Kódigu Penál.
Deputadu Verdiál, defende razaun aprezenta inisiativa ne’e tanba preokupasaun sosiedade nian.
“Dalaruma ita-boot sira haree, kuandu mahasiswa mai iha-ne’e [Parlamentu] hatete, deputadu, Primeiru-Ministru hotu-hotu na’ok-teen, sé imi sente ne’e imi-nia direitu violadu, dalan mak ne’e ba defende ba ita boot sira-nia direitu iha tribunal,” Vise-Prezidente Komisaun A ne’e argumenta.
Nia fundamenta katak, kestaun seluk trata ema seluk la sente iha umanidade, moris iha sosiedade nia leet, kultura no respeita malu, tanba ne’e, órgaun lejizlativa iha kompeténsia atu haree lei ne’e.
Prezidente Komisaun A, Deputadu Natalino dos Santos, hateten audiénsia ne’e hodi rona hanoin husi parte sira atubele Komisaun halo ninia relatóriu no pareser ba apresiasaun inisiál hodi lori ba plenária iha diskusaun faze jeneralidade.
Antes ne’e, Deputadu Natalino, hateten projetu lei ne’e subskreve husi bankada parlamentár sira no iha alterasaun introdús buat tolu; kriminaliza insestu, asédiu seksuál, difamasaun no injúria.
Nia hateten, razaun atu kriminaliza defamasaun tanba iha Konstituisaun artigu 36 ema tenke iha onra, privasidade entaun tenke iha regra atu regulariza hodi eduka.
“Estadu tenke iha regra, iha Konstituisaun artigu 41 kona-ba liberdade espresaun, maibé tenke regula, labele liberdade espresaun konfrome espresa tuir ita-nia hakarak, laiha ona norma umanu, étika, kultura, entaun ita tenke fó regra ida balansu direitu no devér,” nia hateten.
Notísia relevante: https://tatoli.tl/2026/05/26/pn-hakarak-altera-kodigu-penal-hodi-kriminaliza-defamasaun-insestu-no-asediu-seksual/
Jornalista: Nelson de Sousa
Editór: Evaristo Soares Martins
