Top

MKI ho Kompañia Lijuramoxdeily kontinua dezenvolve produsaun masin iha Ulmera no Atabae

Atividades Produsaun Masin iha Atabae. Imajen/Antonio Goncalves

ULMERA, 22 Novembru 2026 (TATOLI)—Diretór Jerál Indústria, Ministériu Komérsiu no Indústria (MKI), Jorge Ferreira, hala’o vizita ba fatin produsaun masin iha Ulmera, Likisá no Atabae, hodi haree direta ba kondisaun reál iha terrenu no vizita ne’e akompaña mós husi Diretór Kompañia Lijuramoxdeily Unipesoál, Lda.

“Hanesan ohin ami mai haree direta fatin produsaun masin iha Ulmera no Atabae, atu haree kondisaun reál iha terrenu,” Diretór Jerál Indústria, Jorge Ferreira, hateten ba TATOLI iha Ulmera, Likisá, domingu ne’e.

Iha vizita ne’e, Diretór Jerál Indústria hasoru malu ho Autoridade Xefe Suku no komunidade sira hodi ko’alia kona-ba prosesu kontinuasaun ba produsaun masin iha área Ulmera no Atabae, ne’ebé sei dezenvolve husi Kompañia Lijuramoxdeily Unipesoál Lda.

Nia esplika, antes ne’e Ministériu iha ona akordu ho kompañia refere tanba ne’e sira mai kontinua prosesu produsaun masin iha área ne’e.

Nia hatutan, kompañia sei rekruta komunidade sira ne’ebé besik ba área refere mak sei sai traballadór ba produsaun masin ne’e.

“Kompania sei rekruta komunidade sira ne’ebé besik ba área refere, hodi sai traballadór ba produsaun masin ne’e,” nia hateten.

Dadauk ne’e, Ministériu Komérsiu no Indústria liu husi Diresaun Jerál Indústria servisu hamutuk ho Kompañia Lijuramoxdeily Unipesoál Lda. hahu kontinua tan dezenvolve produsaun masin iha parte Manatuto, Ulmera no Atabae.

Objetivu atu bele fó kampu traballu ba joven sira ne’ebé hela iha área produsaun masin.

“Ami-nia objetivu mak atu dezenvolve produsaun masin ne’e, hodi bele fó kampu traballu ba joven sira ne’ebé hela iha área produsaun,” Jorge Ferreira dehan.

Iha biban hanesan, Xefe Suku Ulmera, Martinho Correia, hateten komunidade apoia produsaun masin ne’e, tanba bele fó benefísiu ba komunidade lokál.

“Ami nu’udar autoridade suku apoia produsaun masin ne’e, tanba bele fó kampu traballu ba ami-nia joven sira,” Martinho Correia hateten ba TATOLI.

Nia espera, kompañia kontinua koopera ho autoridade suku no komunidade hodi dezenvolve produsaun ne’e ho di’ak.

Jornalista : Hortêncio Sanchez

Editór        : Cancio Ximenes

Publisidade

Leave a Reply

Latest Post

error: Content is protected !!