DILI, 05 Juñu 2026 (TATOLI)—Organizasaun Naun Govermental Timor-Leste Coalition of Education (TLCE), apoiu polítika Ministériu Edukasaun (ME) atu transfere profesór sira ho diploma III husi ensinu sekundáriu ba ensinu báziku.
Diretór Ezekutivu Timor-Leste Coalition of Education, José Monteiro, hateten nia parte aseita planu referidu tanba bazeia ba lei ne’ebé iha katak atu hanorin iha ensinu sekundáriu jerál tenke ho grau lisensiatura.
“Ami aseita 100% tanba iha lei baze edukasaun hateten katak profesór ne’ebé hanorin iha ensinu báziku mínimu baxarelatu no profesór sira-ne’ebé hanorin iha ensinu sekundáriu jerál tenke ho grau lisensiatura ba leten. Se ita matein profesór ho diploma III iha ensinu sekundariu, ida-ne’e viola lei no oinsá atinje kualidade iha eskola sira,” nia dehan ba TATOLI iha kna’ar fatin, Kaikoli, Kuarta ne’e.
Tuir nia katak buat ne’ebé importante mak ministériu tenke iha planu antes atu muda profesór, liuliu tenke fasilita uluk formasaun kurríkulu ensinu báziku ba profesór sira.
Aleinde ne’e, ministériu tenke iha bolsa kandidata ne’e rezerva hodi taka ba hanorin, atu labele implika ba prosesu aprendizajen estudante sira-nian.
“Ha’u hanoin sei laiha implikasaun ba progresu aprendizajen tanba ME sei iha rezerva bolsa kandidatu atu taka ba manorin ne’e nia fatin,” José Monteiro hateten.
Relasiona ho mudansa ka muda manorin tuir nivel estudu, Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, informa ME sei halo mudansa ba profesór sira-ne’ebé antes ne’e hanorin iha ensinu sekundariu ho diploma III hodi bá hanorin fali iha ensinu báziku.
“Maioria eskola sekundária sira manorin balun ho grau baxarelatu, tanba ne’e ita halo ona rekrutamentu ba manorin bolsa kandidata ESJ-ESTV tuir Lei Baze Edukasaun nian katak hanorin iha ESJ-ESTV tenke lisensiatura,” Lopes dehan.
Ba futuru, nia dehan, eskola Governu nian sei lidera husi funasionáriu públiku ho grau lisensiatura no manorin ho grau diploma III sei halo transferénsia ba ensinu báziku.
Nune’e, Domingos enkoraja manorin sira atu kontinua estudu atu hasa’e grau ba lisensiatura hodi garante kualidade.
Jornalista: Osória Marques
Editór: Xisto Freitas da Piedade
