DILI, 18 novembru 2024 (TATOLI) – Provedór Direitus Humanus no Justisa, Virgílio Guterres, apoia polítika rekonsiliasaun ne’ebé inisia husi Xefe Estadu, Jose Ramos Horta, maibé respeita nafatin direitu vítima sira.
¨Inisiativa Xefe Estadu nian, iha kompeténsia tomak atu halo desizaun ruma relasiona ho rekonsiliasaun. Buat ne’ebé provedór pronúnsia mak ne’e kualker rekonsiliasaun ou konversasaun tenke tau direitu umanu sai hanesan prioridade katak rekonsiliasaun ne’e la viola ema seluk nia direitu liuliu direitu vítima sira nian¨, Virgílio Guterres, hateten ba jornalista sira hafoin abertura ba konferénsia Southeast Asia National Human Rights Institution Forúm ba dala 21 ne’ebé halao ia Hotel Novo Turismo Dili, Segunda, ohin.
Tuir provedór katak relatóriu rua ne’ebé hakerek iha Chega CAVR ninian no mós relatóriu CAVR iha ne’ebé koalia kona-ba ita tau vítima sira-nia interese aas liu kualker konversaun ou kualker halo rekonsiliasaun.
¨Ita bele koalia rekonsiliasaun hanesan timoroan, maibé tenke tau vítima sira-nian interese ba inisiativa sira ne’e nia leten, para rekonsiliasaun ne’e labele sai hanesan projetu, maibé tenke sai hanesan prosesu komunikasaun ne’ebé tau ema nia direitu ne’e prioridade, tanba ita-nian dokumentu sira ne’ebé hateten iha CAVR barak koalia kona-ba rekonsiliasaun ita presiza define rekonsiliasaun entre se, se entre timoroan sira iha ne’e ou iha ne’eba, atu nunee loke oportunidade koalia parte rua tenke koalia¨, nia adianta.
Nia dehan iha kestaun rekonsiliasaun ne’e vítima tenke sai prioridade ida ne’e direitu umanus tanba violénsia ne’ebé mosu ne’e hamosu nia laran kanek.
¨Entaun nia mak tenke prontu hateten ema sira ne’ebé halo violénsia hasoru ha’u no ha’u-nia família ho ha’u-nia maluk ida ne’e sira mak tenke koalia¨, nia konklui.
Jornalista: Natalino Costa
Editór : Zezito Silva
