VIQUEQUE, 30 dezembru 2024 (TATOLI)-Deputadu opozisaun partidu Fretilin, Dario Madeira, husu Prezidente Repúblika (PR) hodi fó hanoin ba Governu kontituisionál da-sia hodi aselera prosesu konstrusaun jardín éroi haloot restu mortais ne’ebé dadauk ne’e rai iha uma-mahon, postu Uatulari, munisípiu Viqueque.
“Konstrusaun jardín éroi ba postu Uatulari, ne’ebé konstrui iha iha suku Uma Uain Leten to’o agora konstrusaun seidauk hotu. Dala barak iha parlamentu ha’u hato’o beibeik ona ba Governu, maibé seidauk finaliza konstrusaun. Tanba ne’e, ha’u hakarak husu xefe Estadu PR Ramos Horta hodi fó hanoin ba Governu hodi aselera prosesu konstrusaun jardín erois”, Dario Madeira, ba TATOLI, iha postu Uatulari, ohin.
Nia dehan, restu mortais postu Uatulari hahú faze dauluk 2013 to’o faze dahaat foin lalais 2024 ne’ebé rai de’it iha uma-mahon.
“Ita presiza haloot ona ita-nia eroi sira-nia restu motais tanba rai kleur ona, iha uma-mahon. Se ita rai de’it ne’e, bainhira mak haloot ba fatin dignu”. nia hato’o.
Prosesu konstrusaun jardín eroi Ministériu Asuntu Kombatente no Libertasaun Nasionál loke konkursu iha tinan-2021 hodi halo konstrusaun jardin éroi iha Luga-Asa, hahú konstrusaun iha tinan-2022 ne’ebé konstrui hosi empreza Natureza Furak, Lda mak toma konta hela konstrusaun jardin éroi ne’e, ho kustu ba obra $200.000 resin.
Iha fatin seluk, Diretór empreza Natureza Furak, Lda, Gaspar Coimbra, haktuir, konstrusaun jardín éroi item tolu mak hanesan konstrui pondasi hale’u jardin, gafura no dalan liga ba jardin dadauk ne’e atinji ba 95%.
“Pedidu ami hatama ona pursentu 90% no 10% ba manutensaun nian. Projetu ha’u rekoñese servisu tarde tanba gapura ne’e mak difísil, maibé serbisu hotu ona. Ba kontratu servisu loron 31 dezembru 2024 ne’e”, nia hato’o.
Tuir dadus restu motais rekolla hahú faze dahuluk komisaun rekolla na’in-118, faze daruak rekolla hamutuk 273, faze datoluk na’in-580 ho totál 971 maka daudaun rai iha Uma-Mahon, postu Uatulari.
Enkuantu, tuir dadus saudozu sira-ne’ebé rekolla ba faze dahaat ne’e ho totál 339, maibé saudozu na‘in-22 restu mortál mak família seidauk rekolla tanba liga ba kultura, nune’e iha faze dahaat rekolla 317, nune’e aumenta faze dahaat ne’e restu mortál 1.288.
Jornalista : Vitorino Lopes da Costa
Editór : Rafael Ximenes de A. Belo
