VIKEKE, 02 Jullu 2026 (TATOLI)—Xefe Suku Maluru, Postu Administrativu Vikeke Vila, Munisípiu Vikeke, Bendito Soares, informa komunidade uma-kain 24 husi Aldeia Loho-Oan, Suku Maluru, ne’ebé hela iha área Sentru Formasaun Beasu asesu ona eletrisidade.
“Durante ne’e, ita-nia komunidade Loho-Oan ne’ebé hela iha área Sentru Formasaun SEFOPE la asesu ba eletrisidade, tan ne’e mak ami halo pedidu ba Eletricidade de Timor-Leste, Empreza Públika (EDTL, E.P.),” Bendito ba TATOLI iha Suku Maluru, Kinta ne’e.
Nia hato’o agradese ba EDTL tanba fornese ona eletrisidade ba komunidade asesu no ajuda ona negosiante sira hodi buka moris liuhusi utiliza jeleira no sasán eletróniku sira seluk no tempu kalan abitante ho transporte públiku bele asesu komunidade nia kantina.
“Ami-nia komunidade sira iha área ne’ebá depende ba kafetária no área ne’eba poténsia di’ak tanba besik tasi ibun. Dalabarak ema husi Vikeke bá Uatulari no Uatukarbau sira-nia deskansa iha-ne’ebá. Ha’u sente ida-ne’e ajuda tebes ba komunidade suku Maluru,” nia haktuir.
Bendito hatutan distribuisaun liña eletrisidade ba área Loho-Oan ne’e sai mós oportunidade ba komunidade Suku Maluru hodi hela sai bá sorin tanba área ne’ebá rai sei luan.
Entretantu, tuir dadus, populasaun Suku Maluru hamutuk 1.245 ne’ebe kompostu husi mane 635 no feto 610 ho totál uma-kain hamutuk 301, maioria asesu ona eletrisidade. Enkuantu, iha Suku Maluru kompostu husi aldeia tolu mak hanesan aldeia tolu (3) mak Aldeia Maluru, Makaloso no Loho-Oan.
Jornalista: Vitorino Lopes da Costa
Editór: Xisto Freitas da Piedade
