VIKEKE, 06 Jullu 2026 (TATOLI)—Lansa ona iha Segunda ne’e, Tasa Rotativa iha Postu Administrativu Uatulari, Munisípiu Vikeke, hodi promove joven sira-nia talentu desportivu. Klube futeból hamutuk 23 konfirmadu sei kompete iha tasa referida.
Prezidente Komisaun Organizadora, João Lemos, haktuir jogu futeból ida-ne’e akontese iha Postu Administrativu Uatulari tanba hetan suporta husi Ministru Planeiamentu Investimentu Estrátejiku (MPIE), Gastão Sousa.
“Tasa Rotativa ida-ne’e hanaran GS (Gastao de Sousa) Cup tanba ita-nia ministru ne’e hanoin di’ak ba joven no apoiu másimu ba realiza kompetisaun jogu futeból. Iha inísiu ami hanoin realiza Tasa GS ne’e ba klube hamutuk 16, maibé ami sente katak ita-nia joven barak mak labele partisipa, entaun ami deside fó oportunidade ba joven sira rejista tan klube hamutuk 7 ne’ebé klube hamutuk 23 mak konfirmadu ona atu kompete iha torneiu GS,” João Lemos hateten ba jornalista sira iha Kampu Futeból 59, Suku Afaloikai, Uatulari, Segunda ne’e.
Nia hateten atu jogu futeból ida-ne’e la’o ho susesu presiza komunidade relevante nia kooperasaun no kolaborasaun ba malu.
Prémiu ba manán sira hanesan primeiru lugár hetan 0san $1.000 inklui tasa, segundu lugár $700, terseiru lugár $500 no kuartu lugár $300, mellór guarda-rede hetan $50 ho tasa, mellor jogadór hetan osan $50 ho tasa, jogadór hatama golu barak sei hetan mós osan $50 ho tasa. Durasaun, jogu futeból ne’e durante fulan rua (hahú Jullu to’o 06 Setembru 2026).
Entretantu, kada klube rejista $75 ne’ebé klube hamutuk 23 ho nia orsamentu hamutuk $1.656. Husi orsamentu ne’e komisaun uza ateru kampu no uma. Enkuantu, orsamentu ne’ebé simu husi MPIE hamutuk rihun $5.
Iha fatin hanesan, Administradór Postu Uatulari, Jorge Ribeiro, hato’o agradesimentu ba Ministru Gastão Sousa tanba bele apoia hodi realiza futeból iha Postu Uatulari. Liuhusi jogu sira-ne’e bele halakon konflitu sira-ne’ebé sempre akontese iha Uatulari.
Iha biban ne’e, Ministru Gastão Sousa, prefere jogadór sira tenke hatudu disipliña iha jogu futeból nia laran, atu jogu futeból ne’ebé realiza bele la’o ho susesu, atu populasaun sira bele fó apresisaun ba jogu referidu.
“Tan ne’e, ha’u husu ba autoridade seguransa no komisaun organizadora sira tenke akompaña jogu futeból ida-ne’e, atu ita-nia alin sira bele joga ho di’ak. Tanba ita rona katak Munisípiu Vikeke la iha joven ida mak reprezenta iha selesaun nasionál, tan ne’e liuhusi jogu ida-ne’e ba-oin ita bele hetan jogadór ida di’ak hodi reprezenta Vikeke iha selesaun nasionál. Ha’u sei apoiu nafatin. Tinan oin sei hala’o hikas jogu ida-ne’e. Ne’e duni, ita tenke kolabora hamutuk hodi jogu ne’e sai susesu,” nia sublina.
Iha abertura GS Cup ne’e, Atuál Ministru ofisialmente entrega tasa ba Prezidente Komisaun Organizadora no asiste direta husi klube 23 no hetan partisipa husi autoridade lokál, veteranu, Polísia Nasionál Timor-Leste (PNTL) Munisípiu Vikeke no komunidade Postu Administrativu Uatulari.
Solisita MPIE kria kampu futeból ba joven sira
Iha parte seluk, Xefe suku Afaloikai, Postu Uatulari, Munisípiu Vikeke, Cesário N. Pires, solisita Ministru Planeiamentu Investimentu Estrátejiku (MPIE) kontrui kampu futeból iha Postu Administrativu Uatulari atu motiva joven sira mete desportu.
“Ha’u sente desportu sai hanesan divertimentu ida ba joven sira, sai mekanizmu ida ba minimiza violénsia iha Postu Uatulari. Tanba ne’e, ami hakarak sujere ba Ministru Gastão se bele ajuda ami konstrui kampu futeból hanesan kampu futeból sira iha Dili,” nia informa.
Tuir autoridade komunitária ne’e katak joven sira iha talentu hodi joga futeból, maibé kampu futeból mak sai dezafiu nune’e presiza kampu hodi joven sira promove sira-nia talentu iha área desportu.
“Ami-nia kampu futeból ne’ebé eziste iha Postu Uatulari hamutuk tolu. Ida lokaliza iha Suku Makadike de Cima, Suku Afaloikai kampu futeból ida (1) no Suku Matahoi kampu futeból ida (1), iha-ne’ebé daudaun ne’e kondisaun ladi’ak nune’e labele utiliza,” Cesário informa.
Hatán ba preokupasaun ne’e, Ministru Planementu Investimentu Estrátejiku (MPIE), Gastão Sousa, hateten joven sira kuandu hala’o jogu futebél ho di’ak, la kria problema ruma, MPIE sei harii kampu futeból ida ba joven sira iha Postu Uatulari.
“Ha’u husu ba joven sira imi joga di’ak, ha’u bele promete sei konstrui kampu di’ak ida ba imi joven sira. Ha’u sei haruka Ajénsia Dezenvolvimentu Nasionál (AND) mai haree kampu,” nia promete.
Jornalista: Vitorino Lopes da Costa
Editór: Xisto Freitas da Piedade
