KOVALIMA, 07 fevereiru 2025 (TATOLI) – Muzeu Memoriál Munisípiu (MMM) Kovalima iha tinan-2024 ne’e, rekolla ona narativa funu hamutuk 53 husi Postu administrativu Fatumea, Tilomar, Suai no Zumalai.
Koodenadora Muzeu Memoriál Kovalima, Maria Carvalho Amaral “Bikiak” esplika katak, daudaun foin mak rekolla narrativa funu husi postu haat maibé postu sira seluk seidauk tanba hasoru difikuldade hanesan la iha transporte nune’e uza de’it transporte privadu hodi fasilita serbisu.
“Ami rekolla ona narrativa funu hamutuk 53 ne’ebé rekolla husi ita-nia éroi sobrevivente feto ho mane ne’ebé hahú sira-nia luta dezde 1974 to’o 1999 , ita iha Muzeu jerál se mak sente nia partisipasaun luta ba rai ne’e, Muzeu iha kna’ar atu rekolla narrativa” Maria Carvalho Amaral “Bikiak” relata ba TATOLI, iha Muzeu Kovalima, ohin.
Muzeu rekolla narrativa fotu ba éroi sira-nia partipasaun luta ba libertasaun ne’e, tanba daudaun ne’e sira-nia idade avansadu ona; bainhira la rekolla agora, bainhira sira mate entaun sira-nia istória mós lakon ona.
Tan ne’e Maria dehan, Muzeu esforsu makaas atu rekolla istória sira mai husi aman no inan no avó sira ne’ebé mak uluk hahú funu ohin loron bele hetan liberdade ida-ne’e nune’e bele prezerva sira-nia istória iha muzeu.
“Ami-nia servisu atu rekolla hotu narrative funu postu administrativu hitu maibé mak kobre postu haat, postu tolu seluk seidauk mak hanesan Fatululik, Fohorem no Maucatar tuir planu sei rekolla iha 2025 ne’e”, nia promete.
Atividade ne’ebé durante iha muzeu Memoriál Kovalima hala’o mak hanesan rekolla memória istória ba funu-na’in sira no objetu sira hanesan uluk Aman-Inan no avó sira uza lori halo funu.
Alende rekolla narrativa muzeu mós iha programa induzaun hodi konvida estudante sira prepara oradór konta istória habelar informasaun liuhusi la’o hala’e eskola sira tanba iha Muzeu istória lubuk ida ona no ba sira ne’ebé prontu atu konta sira-nia istória ba mídia.
“Ami konvida eskola rua mai iha muzeu no fasilita formasaun hodi partilla istória ba estudante sira atu hatene istória katak Timor ohin loron maibé atu hetan liberdade la fasil liuhusi situasaun difisil”, nia dehan
Durante rekolla narrrativa hasoru difikuldade hanesan la iha transporte atu fasilita serbisu, haree ba área jeografika postu hitu dook no balun koopera ho Muzeu hodi konta sira-nia istória, sira-nia partisipasaun iha funu balun lakohi konta.
Vizitante ne’ebé mak durante ne’e vizita ona Muzeu Memorial iha Kovalima hamutuk 60. Husi númeru ne’e, feto 308 no mane 297, vizitante mai husi lokál, nasionál no estranjeiru barak mai husi Austrália, Novazelándia no Portugal, maibé hasoru difikuldade tanba seidauk hatene dalén inglés
Muzeu Kovalima estabelese husi Governu liuhusi Centro Nacionál Chega! Institutu Públiku, ho nia planu atu prezeva istória inan-aman no avó sira-nia luta ba libertasaun la presiza atu ba tau iha muzeu nasionál, maibé rai de’it iha muzeu Kovalima
Muzeu Memoriál Munisípiu Kovalima hahú hala’o lansamentu, iha loron 8 dezembru 2021 ho nia objetivu atu prezerva no valoriza istória funu ba libertasaun nasionál dezde 1974 to’o 1999.
Jornalista:Celestina Teles
Editór: Rafael Ximenes de A. Belo
