KOVALIMA, 06 Marsu 2025 (TATOLI) – Ministériu Edukasaun (ME), liuhusi Xefe-gabinete ba diretór jerál planu polítika divizaun informátika, hamutuk ho Autoridade munisípiu Kovalima, kinta-ne’e, inaugura no entrega xave eskola pré-eskolár rua no eskola ensinu báziku ida, iha Postu administrativu Suai, Munisípiu Kovalima.
Atividade inaugurasaun no entrega xave ba eskola tolu, seremónia ofisiál hala’o iha eskola pre-eskolár iha Kamenasa, Postu Suai, Munisípiu Kovalima.
“Ita-boot sira hatene ohin prezente iha ne’e, partisipa serimónia inaugura no entrega xave edifísiu eskola pré-eskolár rua no eskola bázika filiál ida, ne’ebé konstrui liuhusi Kamenasa, Tali-oan no eskola Bá tolu iha Munisípiu Kovalima”, Xefe-gabinete ba diretór jerál planu polítika divizaun informátika, Zeremeas Gomes, dehan ba jornalista sira , hafoin inaugura eskola, iha Kamenasa, ohin.
Atividade inaugurasaun no prosesu entrega xave ne’e, ME implementa projetu liuhusi grupu komunitária ne’ebé nia orsamentu mai husi ME, ne’ebé ohin hala’o ona inaugurasaun nune’e na’in ba projetu no edifísiu mak inan-aman sira.
Ho nune’e, ME fó hanoin ba dirijente eskola atu bele kuida estabelesimentu ensinu ne’ebé foin hala’o inaugurasaun nune’e bele uza eskola ho tempu ne’ebé kle’ur.
Reprezentante Prezidente autoridade Kovalima, Filomeno Cardoso, hato’o agradesimentu ba grupu komunitária sira ne’ebé finaliza ona konstrusaun eskola no hala’o ona seremónia inaugurasaun.
“Husu ba grupu komunitáriu atu submete relatóriu finál ba ita-nia finansa husi Servisu Edukasaun Kovalima nune’e nafatin enkoraja ita-boot sira atu unidade nafatin”, nia dehan.
Prezidente Grupu Komunitáriu EBF Tobur João Magno relata relatóriu servisu durante tinan ida hodi halo konstrusaun Eskola bázika filiál (EBF) Tobur.
“Konstrusaun EBF Tobur ho nia orsamentu hamutuk $ 81.298.13 maibé orsamentu referidu la’ós foti dala ida iha banku maibé foti dala tolu iha banku”, nia informa.
Implementa projetu komunitáriu halo lavantamentu orsamentu ba dahuluk ho 25% ho nia orsamentu $ 20,324,53, levantamentu ba daruak 50% orsamentu $ 20,324,53 no ba terseiru 75% orsamentu $ 17,275,85 no ikus liu halo levantamentu $ 23.337,22.
Ho totál orsamentu $ 81.298.13 hodi atende nesesidade hodi halo akizisaun materiál ba konstrusaun eskola, halo pagamentu ba badaen sira, pagamentu ba enjiñeiru lokál, ba guarda no halo pagamentu ba membru komunitáriu kada enkontru.
Aleinde konstrusaun pre-eskolár Tali-oan ne’ebé hahú konstrui 03 Janeiru 2024 ne’ebé finaliza iha 03 Juñu 2024 maibé hala’o inaugurasaun tanba situasaun balun nune’e projetu referidu hetan estensaun nune’e foin termina iha 30 Dezembru 2024.
Konstrusaun eskola ne’e jere rasik hosi grupu komunitáriu ne’ebé nia prosesu levantamentu orsamentu hanesan ho eskola sira seluk halo.
Fó hanoin fali katak,iha 2023 ne’e Edukasaun Kovalima hetan projetu komunitáriu ualu husi Ministériu Edukasaun mak hanesan, Eskola Bázika Filial (EBF) Tobur, Eskola Bázika Sentrál (EBC) Foho-bua, Eskola Bázika Filiál (EBF) 1,2 Tilomar, eskola pre-eskolár Belulik kraik, eskola pre-eskolár Suai-Loro, eskola pre-eskolár Tali-oan, eskola pre-eskolár audian Kamanasa, eskola pre-eskolár Ogues.
Jornalista: Celestina Teles
Editór: Rafael Ximenes de A. Belo
