DILI, 04 Abríl 2025 (TATOLI)—Diretór Interinu Departamentu Investigasaun Kriminál Nasionál (DIKN), Superintendente Asistenste Polísia, Mouzinho Taves Correia, hateten ekipa konjuntu kompostu husi DIKN no Autoridade Aduaneira (Alfándega) halo apreensaun ba droga ho tipu Kokaina kilógrama 2,94 ne’ebe haruka husi Fransa mai Timor-Leste.
Nia dehan, droga ho tipu Kokaina ne’e importa husi sidadaun Fransa ho naran Douwnlou Youn Han husi Fransa mai Timor -Leste iha 24 Marsu 2025 no to’o Timor-Leste iha 28 Marsu 2025. Maibé, hafoin sasán sira-ne’e to’o Timor iha 2 Abríl 2025, PNTL liuhusi kooperasaun ho Autoridade Alfándega halo pasa revista ba sasán sira-ne’e.
“Iha 3 Abríl tinan ne’e, ita komesa loke sasán sira-ne’e. Bainhira ita loke, ita hetan droga. Droga ne’e ho tipu Kokaina ne’ebé mai husi Fransa, no husi rota Fransa mai Singapura, Denpasar (Bali) no Denpasar-Dili ho aviaun Citilink,” Komamdante Mouzinho hateten ba jornalista sira liuhusi konferénsia imprensa ne’ebé hala’o iha Kuartél Jerál PNTL, Kaikoli, sesta ne’e.
Nia dehan, relasiona ho kazu ida-ne’e, PNTL detein ona suspeitu estranjeiru feto ida iha sela detensaun DIKN durante oras 72 nia laran.
“Iha Timor-Leste ita mós identifika ema ne’ebé simu sasán ida-ne’e. Entaun bazeia ba informasaun ne’ebé ita iha, ita detein tiha ona sidadaun estranjeira ida ho inisiál YG ne’ebé agora iha ita-nia kontrolu. Prosesu la’o hela. Ohin prosesu ne’e hatama tiha ona bá Ministériu Públiku ho númeru NUC 0090/25. PNSIK,” nia afirma.
Mouzinho dehan, kazu ida-ne’e konsideradu hanesan krime oeganizadu no bem organizadu.
“Kazu ne’ebe mak relasiona ho droga, klaru ne’e krime tranznasionál organiza husi nasaun ida bá nasaun seluk através husi aviaun no roo. La respeitu área juridika nasaun ida nian,” nia haktuir.
Mouzinho hateten prosesu ba kazu ne’e sei la’o hela no sei buka tan ema ne’ebé sai suspeitu principal.
Nia informa katak atu halo prevensaun ba krime tranznasionál ne’e la’ós autoridade ida ka rua de’it, maibé ne’e presiza envolvimentu husi siénsia barak, hahú husi nível nasionál no nível rejionál.
Iha fatin hanesan, Komisáriu Autoridade Alfándega, Joanico Pereira, dehan ekipa konjunta halo atuasaun ba merkadoria ne’ebé hatama sasán kontra no bandu lei Timor-Leste nian no fó ameasa ba timoroan liuliu joven sira-nia vida.
“Bainhira Alfándega simu informasaun husi ita-nia rede Alfándega mundiál nian katak iha objetu droga ne’ebé iha-ne’e haruka husi nasaun Fransa ho nia finál distinasaun mai iha Timor-Leste,” nia informa.
Nia esplika bainhira Alfándega simu informasaun, sira halo apuramentu ho konfidelidade nune’e objetu ne’e mai Alfándega akompaña ho rota husi Fransa mai iha Singapura-Bali- Timor-Leste ne’e no bainhira sasán ne’e to’o, sira halo komunikasaun nune’e sasán ne’e labele ba nia na’in.
“Ami-nia koordenasaun ho Alfándega iha Bali hodi halo ezaminasaun ba objetu ne’e. Infelizmente objetu ne’e to’o iha Timor ho rezultadu teste ne’ebé uza K9 la deteta buat balun. Tanba ne’e, ami halo teste prelimináriu ba área jurídika Alfándega iha Aeroportu Internasionál Nicolau Lobato Dili ho modus operandu foun ne’ebé tau iha dós (kaisa) nia laran ho falun metin. Bainhira ami check kaisa ne’e, buat ida laiha no ami halo ezaminasaun ho mákina X-Ray to’o dala 7 mós objetu prinsipál laiha tanba bainhira halo scan sai mai mutin de’it. K aisa ida-ne’e ita scan oin-seluk ona, signifika ita suspeita buat ruma,” nia haktuir.
Nia hatutan, bainhira Alfándega sobu tiha kaisa ne’e, ekipa deteta droga, nune’e Alfándega entrega imediata mai iha PNTL liuhusi DIKN para bele aprofunda liután nia prosesu ne’e no mós kaer mós suspeitu na’in ba sasán ne’e.
“Ha’u lori Autoridade Alfándega nia naran hato’o agradesimentu ba PNTL liuhusi DIKN nia kolaborasaun di’ak atu guarda tiha sasán ne’e ba Ministériu Públiku (MP) no bá-oin ita sei servisu hamutuk atubele kombate krime organizadu husi rai seluk ne’ebé koko atu infiltra iha ita-nia rain,” nia konklui.
Rekorda fali karak droga ho tipu Kokaina antes ne’e autoridade polísia halo ona apreensaun iha tinan 2012 ho kilógrama rua-resin.
Jornalista: Natalino Costa
Editór: Xisto Freitas da Piedade
