Xefe Estadu hato’o omenajen ba saudozu John Miller
DILI, 07 Maiu 2026 (TATOLI)—Prezidente Repúblika, José Ramos-Horta, partisipa iha eventu reflesaun espesiál ne’ebé hala’o iha Asosiasaun HAK (Asosiasaun ba Direitu, Direitus Umanus no Justisa) iha Faról, Dili, hodi fó onra ba moris no legadu husi ativista internasionál saudozu John Miller ne’ebé hakotu iis iha 23 Abríl 2026, iha sidade Neva Iorke, ho idade tinan 70, tanba atakasaun-fuan (heart failure).
Ko’alia liuhusi vídeo-konferénsia, Xefe Estadu hanoin fali amizade ne’ebé naruk besik dékada lima, hodi nota katak Miller mak husi apoiante dedikadu sira-ne’ebé hamriik hamutuk ho povu Timor dezde tinan 1974.
Prezidente enfatiza katak Miller nia kompromisu ne’ebé metin tebes ne’e ajuda harii fundasaun ba rede globál ne’ebé ikusmai luta ba Timor-Leste nia direitu ba auto-determinasaun.
Durante diskursu Prezidente hato’o agradesimentu kle’an ba koalizasaun oioin husi aliadu internasionál sira, husi nasaun Afrikanu lian Portugés (PALOP) to’o lider bipartidáriu sira iha Estadus Unidus no Austrália ne’ebé apoia nasaun nia luta.
“Movimentu solidaridade ne’e, ne’ebé kompostu husi ema influente sira husi sorin karuk to’o loos, sindikatu sira no instituisaun relijiozu sira, apoia tebes duni povu Timoroan, hodi lori ita ba referendu no independénsia. Movimentu ne’e ultrapasa ideolojia polítika sira, hodi halibur hamutuk atór globál oioin hodi defende kazu Timor-Leste nian,” Ramos-Horta tenik iha nia diskursu.
Hodi hanoin fali pontu mudansa husi Masakre Santa Cruz 1991, Prezidente foti katak oinsá solidaridade internasionál sai forte liután hodi dudu ba referendu no independénsia.
Hodi fó onra ba saudozu John Miller nia memória, Prezidente Ramos-Horta reafirma hikas Prezidensia nia kompromisu hodi hanoin nafatin korajen morál no polítika husi belun estranjeiru hotu.
Prezidente Ramos-Horta konklui hodi agradese ba sira-ne’ebé halibur hamutuk hodi mantein istória movimentu solidaridade ne’e moris nafatin, hodi garante katak kontribuisaun husi aliadu sira hanesan Miller sei kontinua sai parte integrál husi istória nasaun nian.
Momentu importante ne’e partisipa mós husi Sekreteriu Jerál Partidu FRETILIN Marí Alkatiri.
“Kalan Reflesaun ba saudozu ativista Jhon M. Miller (ETAN) sidadaun Amerikanu ne’ebé mak dezde tempu rezisténsia kontribui maka’as husi grupu solidariedade iha fatin-fatin, ida mak saudoso Jhon M. Miller. ETAN ne’ebé ativu tebes hamutuk ho grupu oioin solidariza Timor-Leste nia kauza iha mundu internasionál, solidariedade husi rai-li’ur muda politika internasionál ba Timor-Leste,” Alkatiri hateten.
Fundadór, Antigu-Primeiru-Ministru no atuál Sekretáriu-Jerál FRETILIN Mari Alkatiri husu atu Timor-Leste kontinua nafatin loke matan hodi fó solidariedade ba povu iha mundu hanesan iha Sahara, Palestina no rai seluk ne’ebé mak presiza solidariedade.
Saudozu Jhon Miller hetan ona rekoñesimentu husi Estadu Timor-Leste liuhusi kondekorasaun ne’ebé mak oferese husi Prezidente Repúblika.
Jornalista : Hortêncio Sanchez
Editór : Cancio Ximenes
