DILI, 11 Abríl 2025 (TATOLI)—Polísia Sientífika Investigasaun Kriminál (PCIC-sigla portugés), sesta ne’e, tuku 09:00 Otl, ezekuta mandadu Tribunál hodi asegura sidadaun na’in-rua ho inisiál FM no ANMP tanba alegadamente envolve krime asosiasaun kriminoza ne’ebé previstu no punidu iha artigu 188 Kódigu Penál Timor-Leste, diskriminasaun rasiál relijioza ne’ebé previstu iha artigu 135 no krime burla agravada ne’ebé previstu no punidu iha artigu 267.
Sidadaun na’in-rua ne’e Polísia Sientífika Investigasaun Kriminál ezekuta orden judusiáriu hodi halo buska no auto-apreensaun ba sira-nia rezidénsia iha Faról no Kamea tanba nu’udár dirijente másimu halo atividade Igreja Katólika Karizmátika Timor-Leste (ICCTL-sigla portugés).
Iha auto-buska no apreensaun, ekipa PCIC asegura evidénsia no prova sira hanesan kazula mean inklui dokumentu balun ne’ebé tau iha kaixa ida nia laran. Hafoin ekipa PCIC halo tiha buska no auto-apreensaun ba sidadaun na’in-rua referida, ekipa PCIC lori kedas sidadaun rua ne’e hamutuk ho evidénsia sira bá halo identifikasaun.
“Ohin, ekipa PCIC kumpre mandadu husi Tribunál Judisiál Primeira Instánsia Dili hasoru suspeitu na’in-rua. Mandadu ida-ne’e tanba suspeitu na’in-rua suspeitadu ba krime asosiasaun kriminoza, diskriminasaun relijioza no burla agravada,” Jestór Operasaun Investigaór PCIC, Fidel Belo da Cruz ba jornalista sira iha edifisiu PCIC.
Nia dehan, durante buska, PCIC konsege rekolla prova sira no agora daudaun PCIC asegura ona iha edifisiu PCIC hodi halo identifikasaun hodi remete ba Ministériu Públiku.
“Konforme mandadu judisiáriu, la halo detensaun ba sira, maibé halo de’it auto-apreensaun no buska ba sira na’in-rua. Depois iha informasaun tuir fali mai katak iha inísiu ruma ne’ebé indika ba sira na’in-rua, entaun bele halo detensaun ba sira,” Fidel esplika.
Nia informa, tuir lei, iha oras 42 nia laran PCIC elabora auto-notísia krime hodi remete filafali bá Ministériu Públiku.
Entretantu, tuir Konstituisaun RDTL Artigu 45 define katak:
- Ema hotu tenke iha liberdade ba konxiénsia, relijiaun no ba kultu, nune’e konfisaun relijiozu sira haketak ho Estadu.
- Labele halo ta’uk no labele diskrimina (hatún) ema ida tanba nia konviksaun relijioza.
- Iha garantia ba objesaun tuir konxiénsia, tuir lei haruka.
- Iha garantia ba liberdade atu hanorin relijiaun ne’ebé de’it, maibé iha relijiaun idak-idak nia laran.
Jornalista: Natalino Costa
Editór: Xisto Freitas da Piedade
