BOBONARU, 08 Jullu 2026 (TATOLI)- Provedoria Direitu Umanu no Justisa (PDHJ, sigla portugés) Delegasaun Territoriál Maliana, Munisípiu Bobonaru, simu keisa violasaun Direitu Umanu no Boa-Governasaun hamutuk ualu durante períodu Janeiru to’o Juñu 2026.
Diretór PDHJ Maliana, Elizeu Lopes, dehan husi keixa ualu ne’e, barak liu rejista iha Munisípiu Bobonaru, ho kazu haat, no seluk rejista iha Kovalima.
“Kazu ualu ne’e ninia kategoria violasaun direitu umanu ka ne’e iha atividade halai liubá violasaun hasoru governasaun di’ak, liuliu sira ne’ebé asume knaar públiku hanesan ofisiál Polísia sira. Depois kona-ba implementasaun programa governu nia hanesan foin lalais virál uma dignu iha Tunubibi. Ida-ne’e ita halo monitorizasaun urjente, ita relata ona ba nasionál. Notifikasaun fó ona, bainhira ami atu halo prosesu ne’e kompeténsia sira nasionál nian”, Elizeu Lopes informa ohin.
Nia esplika katak keixa hotu-hotu ne’e aprezenta ona ba Komité Jestaun Keixa (KJK) hodi avalia no determina estatutu kada kazu.
Notísia relevante: Atuasaun PNTL iha Ai-Mutin viola kódigu étika no padraun profisionál seguransa-PDHJ
“[Komité] sira mós haree ida-ne’e tama iha knaar ou responsablidade PDHJ nia ka la’e? Se la’e sira rekomenda ou taka, maibé barak liu sira rekomenda ba parte relevante sira. Ba kazu sira ne’e, notifikasaun ita entrega hotu ona ba kesar-na’in sira, ikus liu ida iha Suai”, nia dehan.
Relasiona ho kazu violasaun direitu umanu no boa-governasaun neʼebé kontinua rejista kada tinan, Elizeu dehan ba oin PDHJ Maliana nafatin halo sensibilizasaun ba funsionáriu públiku, ajente polísia, komunidade no estudante sira, nune’e bele minimiza kazu hirak-ne’e.
Notísia relevante: PDHJ Maliana sei kontrola funsionáriu públiku abandona servisu iha kampaña eleitorál
Jornalista: Sergio da Cruz
Editora: Maria Auxiliadora
