PDHJ Maliana sei kontrola funsionáriu públiku abandona servisu iha kampaña eleitorál

February 16, 2023
05:39 PM
Facebook Instagram X WhatsApp Telegram

*Diretór PDHJ Delegasaun Territórial Maliana, Domingos Pinto Tavares. Imajen Tatoli/Sérgio da Cruz.*

BOBONARO, 16 fevereiru 2023 (TATOLI)-Provedoria Direitu Umanu no Justisa (PDHJ, sigla portugés) delegasaun territoriál Maliana, sei orienta ekipa fiskalizasaun kontrola funsionáriu públiku sira-ne’ebé abandona servisu ba fali akompaña no partisipa atividade kampaña eleitorál ne’ebé tuir kalendáriu sei hahú iha loron 19 abríl.

Diretór PDHJ delegasaun territoriál Maliana, Domingos Pinto Tavares, esplika, sei kontinua hala’o aktvidade ne’e tamba PDHJ nia papél mak halo fiskalizasaun ba asuntu governasaun di’ak no violasaun direitu umanu.

Notísia relevante: Xefe Estadu sei dekreta kalendáriu Elisaun Parlamentár iha fevereiru 2023

“Iha tinan polítiku ida-ne’e ba asuntu governasaun di’ak, ne’e ami tau matan liu ba funsionáriu no profesór sira, labele abandona aula. Sé funsionáriu karik labele abandona servisu,” nia informa ba jornalista sira, iha kna’ar fatin foin lalais ne’e.

PDHJ mós sei koordena ho órgaun eleitorál, liuliu Komisaun Nasionál Eleisaun (CNE) no partidu polítiku sira oinsá atu identifika no prepara fatin kampaña eleitorál ne’ebé dook hosi patrimóniu públiku ne’ebé lei bandu.

PDHJ mós sei halo fiskalizasaun ba funsionáriu públiku ne’ebé utiliza patrimóniu estadu halo konboiu ho partidu polítiku sira ba to’o fatin kampaña.

“Kuandu ami hetan, depois ami-nia relatóriu relata liu ba parte CAC atu haree liu ba buat ida uza patrimóniu estadu la tuir regra,” Domingos akresenta.

Kona-bá asuntu direitu umanu, durante tinan polítiku, PDHJ sei hare liu ba involvimentu ema ho defisiensia, liuliu labarik sira iha atvidade kampaña, maske sira mós iha direitu atu rona informasaun no espresa sira-nia sentimentu.

PDHJ mós sei tau matan ba atuasaun entidade estadu hanesan Polísia Nasionál Timor-Leste hasoru militante hosi partidu polítiku sira.

Tanba dalaruma sira mai ho grupu boot la organiza di’diak bele homosu konfrontu no seluk tan no balu uza motorizada kanu-resin halo barullu sees fali hosi palku kampaña.

“Ita atu haree sira-nia situasaun ne’e oinsá, sira ba fó hatene uluk ka koordena ho responsável partidu ka halo kedas agresaun fízika. Ida-ne’e mak ita tau matan, atu nune’e ita hotu-hotu servisu tuir regra ka lei ne’ebé mak iha,” nia katak.

CNE fó-sai katak partidu polítiku 24 mak preparadu konkorre iha eleisaun lejizlativa 2023 tanba priense ona rekizitu hanesan;