DILI, 17 Abríl 2025 (TATOLI) – Arsebispu Arkidioseze Metropolitana Dioseze Dili, Dom Virgílio do Carmo da Silva, husu sarani Katólika sira, iha ámbitu selebrasaun Páskua ne’e, atu aproveita momentu semana santa ho fiar, moos no haraik aan, tanba Jesus mak esperansa.
Páskua mak konvida ita timoroan sira hotu, sarani ida-idak atu foti ita ulun, loke ita matan hatene haree buat ne’ebé folin boot. Dala ida tan ksolok ne’ebé loos hetan iha-ne’e. Ita haksolok, la’ós tanba buat ne’ebé ohin ita iha maibé aban sei naben. Maibé, tanba laran metin iha Maromak nia mak ita-nia esperansa; esperansa labosok.
“Ksolok moris hias ida-ne’e mak konvida ita timoroan sira, sarani ida-idak atu foti ita-nia ulun, loke ita-nia matan, hatene haree buat ne’ebé folin boot, buat ne’ebé aas, buat ne’ebé furak no buat ne’ebé di’ak liu iha moris”, Arsebispu Dom. Virgilio Kardeál do Carmo da Silva, perante ba jornalista sira iha konferénsia imprensa, iha Kámara Eklesiástika Lecidere, Dili, ohin.
Arsebispu ne’e hato’o katak ida-ne’e mak ksolok ida mai husi Jezus moris hias. Ho espíritu Jezus moris hias nian. “Ha’u hakarak hato’o ha’u-nia boasfesta santa Páskua 2025 ba sarani hotu-hotu. Liuliu ba timoroan sira hotu, la’ós de’it haree iha rai laran, maibé mós sira-ne’ebé tanba servisu, estuda no balun mós tanba moras, ne’ebé namkari lemorai iha mundu,” kardeál hato’o.
“Haksolok iha Jesus moris hias, tanba nia hadomi ó. Tansá o buka tiha mate sira, ema ne’ebé moris hela, nune’e mós buka atu hadomi nafatin, hamriik metin nafatin no laran metin nafatin ba Maromak ida moris nian”, nia hateten.
Ne’e duni, tuir Kardeál katak la’ós hakruuk, maibé foti ulun hateke ba lalehan husi leten sei hetan resposta, tansa imi buka iha mate sira leet, ema ne’ebé moris. Nia ema moris, moris iha nia, no iha nia moris ida-ne’ebé lahatene mate.
“Mate laiha tan kbiit atu sobu moris ne’ebé iha nia, tanba nia iha kbiit ida eterna no imortál. Imi ida lahanoin buat ida bainhira nia sei iha imi leet. Moris ne’ebé saran tanba domin, sei ladodok, sei la aat, maibé moris”, nia esplika.
Amu Kardeál hatutan, nia mai liuhusi mundu ida mate nian, atu hamamuk mundu ida mate nian, ho mundu Maromak ninian. Bainhira nia tama iha mundu mate sira-nia, nia hatama mós moris ida imortál katak mate laiha tan ona kbiit.
“Agora iha de’it mak mundu ida Maromak nian. Mai ita hanoin fali Jezus nia liafuan katak ema be hakarak soi nia moris sé lakon nia, maibé ema ne’ebé lakon nia moris tanba ha’u, sei hetan nia”, nia hateten.
Kardeál énfaze katak ema manán saida hodi manán mundu tomak, maibé lakon nia moris tan nia bele troka nia moris ho saida? Ema ida-ne’ebé ita hotu buka, hadomi tebes, mak ida-ne’ebé iha moris. Nia mak kristu.
Entretantu, Jezus mak kauza no razaun ba ema sarani ida-nia ksolok. Tan ne’e, iha loron haat-nulu ita sarani sira hadera aan, halo jezum, abstinénsia halo di’ak ba malu liuhusi karidade, halo orasaun harohan mak dalan ba ita sarani atu hola parte iha festa boot Jezus moris hias ninian, mak ita hotu ninia esperansa.
Jornalista: Alexandra da Costa Santos
Editór: Rafael Ximenes de A. Belo
