DILI, 23 Maiu 2025 (TATOLI) – Konsellu Imprensa (KI) lansa kompetisaun prémiu “Balibo Five” hodi fó oportunidade ba jornalista sira atu kompete, ho kategória hanesan Prémiu Balibo Five (the best media awards), Prémiu Adelino Gomes, Prémiu Francisco Borja da Costa, Prémiu Greg Shackleton, no Prémiu Bernardino Guterres.
Kategória hirak-ne’e jornalista sira sei halo reportajen jornalístisku ba asuntu interrese umanu, direitus umanu liuhusi forma vídeo, fotográfia no reportajen.
Prezidente Konsellu Imprensa, Otelio Ote hateten katak ohin hahú fali momentu istóriku ne’ebé kada tinan hala’o ba mundu jornalizmu. Katak, prémiu ida-ne’e halo tinan ba tinan.
“Ita haree tinan hirak liubá mós realiza no tinan ida-ne’e ita halo espesiál uitoan tanba ita selebra tinan 50 ba trajédia “Balibo Five”, prezidente KI ne’e informa ba jornalista sira iha salaun konferénsia KI, Kintal Boot, Dili, ohin.
Prémiu Balibo Five ida-ne’e atu reprezenta ema hotu ne’ebé mate iha Balibo nune’e hamosu sentimentu ladun di’ak ba família sira bainhira sira mai reprezenta sira-nia oan. “ Prémiu ida-ne’e boot tebes ita dehan ‘the best of the best’ katak prémiu ne’e sei atribui di’ak liu iha tinan kotuk,” nia kompara.
Autoridade másima órgaun reguladora ne’e anúnsia, hahú ohin jornalista sira tenke determina ona notísia saida mak atu lori ba kompete no redasaun sira mós hahú planu ba kobertura.
Jornalista ne’e preparadu ka iha ona alvu atu hetan prémiu di’ak sira mós iha ona jestaun atu halo kobertura no halo notísia ne’ebé kualidade ne’e iha tiha ona tinan ida antes, nune’e bainhira ita anúnsia nia la’ós foin mak hakfodak.
Tanba notísia sira-ne’e KI la’ós foti iha tinan ida-ne’e maibé foti husi notísia sira-ne’ebé foti tiha ona dezde tinan kotuk hahú husi fulan-Outubru.
“Ne’e nu’udar previléjiu ida ba ita-boot sira hanesan profisaun jornalista bainhira manán prémiu ita-nia mídia naran boot inklui mós jornalista ne’e rasik”, nia konsidera.
Intensaun husi prémiu ne’e, tuir líder másimu KI, la’ós de’it sukat jornalista nia profisaun maibé atu sukat mós dezempeñu.
Enkuantu, tuir Vise-prezidente AJTL, Acacio Pinto, AJTL orgullu tanba KI iha inisiativa atu kontinua promove jornalista na’in-lima – Greg Shackleton, Gary Cunningham, Tony Stewart, Malcolm Rennie, no Brian Peters, ne’ebé mate iha Balibo five iha loron 16 fulan-Outobru 1975, entaun ita mos presiza rekoñese sira-nia kontribuisaun.
“Hakarak atu fó prémiu ba jornalista ida-ne’ebé di’ak liu iha kada tinan aleinde ne’e mós hodi komemora loron trajédia Balibo Five ba-50”, nia dehan.
Nune’e, AJTL nafatin komprometidu atu fó prémiu maibé AJTL mós hatene oinsá atu kontribui dezenvolvimentu mídia no apoiu KI atu bele fó prémiu ne’ebé di’ak liu ba jornalista sira.
Entretantu, rekezitu ba konkorrente sira mak hanesan tenke sidadaun timoroan, aprezenta kartaun identidade mídia nian, karteira profisionál válidu, aplikasaun la elijevél ba jornalista ne’ebé hetan ona prémiu dala rua no obra jornalista hakerek ho lian ofisiál no lian traballu nian.
Kompetisaun ne’e hahú loke iha loron ohin (23/05/2025) to’o loron 29 fulan Agostu 2025 no b manán-na’in sei hetan prémiu hanesan osan, taxa no sertifikadu.
Jornalista: Alexandra da Costa
Editór: Rafael Ximenes de A. Belo
