DILI, 03 Juñu 2026 (TATOLI) – Komisaun C ne’ebé Trata Asuntu Finansa Públika halo ona redasaun finál ba proposta Orsamentu Retifikativu (OR) tinan 2026 nian.
Prezidente Komisaun C, Deputada Cedelízia Faria dos Santos, esplika Parlamentu Nasionál halo aprovasaun finál globál, maibé durante diskusaun iha proposta haat mak pasa ne’ebé adita tán artigu foun no realokasaun orsamentu interna husi entidade públika.
Ho ida-ne’e laiha mudansa ba ninia kategória sira no montante totál ba OR laiha mudansa, mantein husi inísiu ne’ebé Governu propoin mai.
“Ohin Komisaun halo aprovasaun redasaun finál, no orsida kedas ami sei haruka ba Prezidente Parlamentu atubele haruka ba Prezidente Repúblika [promulga],” nia hateten hafoin ramata reuniaun Komisaun iha Parlamentu, kuarta ne’e.
Tuir planu, iha loron 05 Juñu mak Prezidente Parlamentu Nasionál sei submeter proposta lei OR ba Prezidente Repúblika.
“Espera Prezidente Repúblika bele promulga iha tempu badak, tanba pedidu ne’e mai ho karáter urjénsia,” nia dehan.
Parlamentu Nasionál, liuhusi reuniaun plenária iha 02 Juñu aprova proposta Orsamentu Retifikativu (OR) ho montante millaun $192 iha finál globál ho votu a-favór 42, kontra 0 no abstensaun 23 husi FRETILIN no PLP.
Notísia relevante: https://tatoli.tl/2026/06/02/parlamentu-aprova-proposta-orsamentu-retifikafivu-iha-final-global/
Jornalista: Nelson de Sousa
Editór: Evaristo Soares Martins
