DILI, 03 Jullu 2025 (TATOLI)–Diretór Ezekutivu ba Unidade ho Misaun Kombate Stunting ka Raes Badak (UNMICS, sigla ingles), Joel Maria Pereira, hatete benefisiáriu ba programa ai-han integradu iha suku sia mak hanesan Bairopite, Kampung Alor, Maloa, Matata, Memo, Taeboco, Bobometo, Naemeco no Lifau.
Nia dehan programa ne’e lansa iha tinan kotuk husi Vise-Primeiru Ministru, Ministru Koordenadór asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino, ho objetivu fó ai-han nutritivu ba ema ne’ebé ho kondisaun má nutrisaun.
“Programa ai-han integradu, ita fó ai-han nutritivu loron-loron ba benefisiáriu sira hahú husi segunda to’o sábadu, maibé ita entegra mós ho atividade sira seluk hanesan formasaun oinsá ba tein ai-han nutritivu”, nia dehan ba TATOLI iha nia knaar fatin Farol, tersa ne’e.
Notísia relevante: UNMICS lansa programa nutrisaun integradu iha suku sia
Diretór ne’e mós informa benefisiáriu ba programa ai-han integradu inisiu tinan 2023 hamutuk 700 iha munisípiu haat.
“Munisípiu Dili ita-nia benefisiáriu mak suku Bairopite, Kampung Alor no Maloa, Ermera ita servisu hamutuk ho padre parókia Railaku identifika suku Matata mak benefisiáriu, Bobonaru suku Memo, Oekusi mak suku Bobometo, Naimeco no Lifau”, dehan nia.
Nia mós hatutan daudaun ne’e UNMICS servisu hamutuk ho liña ministeriál sira atu servisu maka’as hodi halakon má nutrisaun.
“Hanesan Ministériu Saúde sira mak sei relata dadus no halo tratamentu ba benefisiáriu sira idade husi zero to’o tinan-lima, no ministeriu agrikultura oinsá atu prepara ai-han nutritivu no eduka komunidade konaba toos uma-hun, obras públika oinsá atu haree bee-moos ba komunidade”.
Notísia relevante: UNMICS halo konsulta nasionál hodi finaliza kompromisu nutrisaun ba kreximentu N4G
Jornalista : Osória Marques
Editora : Rita Almeida
